ເຖິງສົມບັດ…ຈາກ ຊຸຍມິງ (7)

ອ້າຍສົມບັດທີ່ແສນຮັກ,

ມື້ນີ້ ວັນທີ 17 ເດືອນ ກຸມພາ ເປັນມື້ວັນເກີດຂອງອ້າຍ. ມັນເປັນປີທີ 3 ທີ່ອ້າຍບໍ່ໄດ້ ສະຫລອງວັນເກີດກັບນ້ອງ. ບໍ່ໄດ້ສະຫລອງວັນເກີດກັບນ້ອງກໍແມ່ນມີຄວາມຍາກຫລາຍ ແລ້ວ; ແຕ່ວ່າ ບໍ່ມີອ້າຍສົມບັດຢູ່ກັບ ຊຸຍມິງ ໃນມື້ພິເສດນີ້ ກໍຍັງເປັນການເສົ້າໃຈທີ່ ອົດທົນໄດ້ຍາກ.

17 February 2015ເພື່ອເປັນການລະນຶກເຖິງມື້ວັນເກີດນັ້ນ, ພີ່ນ້ອງ ຄອບຄົວຂອງອ້າຍສົມບັດແລະນ້ອງເອງໄດ້ໄປ ເຄນອາຫານ ຢູ່ວັດປ່ານາຄູນນ້ອຍໃຫ້ພຣະສົງ ຊຶ່ງເປັນວັດທີ່ເຈົ້າໄດ້ມີການພົວພັນ ຢ່າງໃກ້ຊິດ. ເປັນວັດທີ່ເຈົ້າໄດ້ເລີ່ມຕັ້ງ ໂຄງການ ພຸດທະສາສະໜາເພື່ອການພັດທະນາ (ຄ.ພ.ພ) ເປັນຄັ້ງທຳອິດ ຢູ່ໃນຄວາມອຸປະຖັມຂອງ ພຣະອາຈານຊາລີ ຮອງປະທານ ຂອງອົງການ ພຸດທະສາສະໜາ ສຳພັນລາວ. ຢູ່ໃນ ຄ.ພ.ພ ເຈົ້າຍັງສາມາດໄດ້ສະເໜີ ຕໍ່ ພຣະສົງຈຳນວນນຶ່ງ ແນວຄິດຂອງພຸດທະສາສະໜາທີ່ຕ້ອງເອົາຈິງເອົາຈັງ ເປັນລະບົບ ຂອງການສິດສອນພຸດທະສາສະໜາ ແລະພາກປະຕິບັດທີ່ຈຸງໃຈໃຫ້ພຣະສົງອອກຈາກ ຂອບເຂດຂອງວັດວາອາຮາມແລະມີພັນທະຫລາຍຂຶ້ນກັບບັນຫາ ທີ່ກະທົບຕໍ່ຊຸມຊົນທົ່ວໄປ ແລະໃນສັງຄົມ. Continue reading “ເຖິງສົມບັດ…ຈາກ ຊຸຍມິງ (7)”

ເຖິງສົມບັດ…ຈາກ ຊຸຍມິງ (6)

​ເຖິງ ສົມບັດ ທີ່​ຮັກ​​​,​

​ເປັນ​ເວລາ 2 ປີ ​​ເຕັມໆ ​​ນັບ​ຕັ້ງ​ແຕ່ຄືນ​ວັນ​ທີ15 ທັນວາ 2012 ທີ່​ເຈົ້າ​ຖືກ​ເອົາ​ຕົວ​ໄປຈາກ​ຂ້ອຍຢ່າງ​​ໄຮ້​ມາລະຍາດ. ຂ້ອຍ​​ຢາກ​ໃຫ້​ເຈົ້າ​ຮູ້​ວ່າ​​ໄລຍະ 2 ປີທີ່​ຜ່ານ​ມາ ຄຳ​ເວົ້າ​ຂອງ​ເຈົ້າທີ່ເວົ້າວ່າ “​ໄປ໋ ​ເມືອ​​ເຮືອນ” ​ດັງຢູ່ໃນຫົວຂ້ອຍຊໍ້າ​ແລ້ວ​ຊ້ຳ​ອີກບໍ່​ຮູ້​ເທົ່າ​ໃດ​ເທື່ອ ​​ຕອນນັ້ນ​​ເຈົ້າ​ມາ​ຫາ​ຂ້ອຍ​ທີ່​ຮ້ານ​ຊາວບ້ານ ​​​ແລ້ວ​ຂ້ອຍຈື່​ໄດ້​ວ່າຂ້ອຍ​ຕອບ “​ໂອ​ເຄ” ​ແລ້ວ​ຂ້ອຍກໍ​ໄປ​ເອົາ​ກະ​ເປົາ ​ເພື່ອ​ຍ່າງ​ໄປ​ເອົາ​ລົດ​ຄົນ​ລະ​ຄັນ​ເພື່ອ​ກັບ​ບ້ານ. ຕັ້ງ​ແຕ່​ມື້​ນັ້ນ ​ເຈົ້າ​ບໍ່​ໄດ້ກັບ​ມາເຮືອນ​ອີກ​ເລີຍ.

ສົມບັດ​ເອີຍ,​​​ສອງ​ປີຜ່ານມາ​ນີ້ ຂ້ອຍຕັ້ງ​ຄຳ​ຖາມ​ໃນ​ໃຈ​ຕະຫຼອດ​ວ່າ​​ເຫດການຕ່າງໆ ຈະ​ແຕກ​ຕ່າງ​​ໄປ​ຈາກນີ້​ບໍ່ ຖ້າ​ຫາກ​ຂ້ອຍ​ບໍ່​ໄດ້​​ເອົາ​ລົດ​ຂອງ​ເຮົາ​​​ໄປ​ກ່ອນ​ໃນ​ເຊົ້າ​ມື້​ນັ້ນ ​ເຮັດ​ໃຫ້​ເຈົ້າ​ຕ້ອງ​ໄດ້​​​​ຂັບລົດ​ຈິບ​​ເກົ່າໆ ຂອງ​ເຈົ້າ​ເພື່ອ​ໄປ​ຕີ​ປິງປ໋ອງ​ໃນ​ຕອນ​ແລງມື້​ນັ້ນ? ​ເຈົ້າ​ອາດ​ຈະ​ໄດ້ຢູ່​ໃນລົດ​ຄັນ​ດຽວ​ກັນ​ກັບ​ຂ້ອຍ ​ເຖິງ​ວ່າ​ມື້​ນັ້ນ​ພວກ​ເຮົາ​ອາດ​ຈະ​ຖືກ​ເອົາ​ຕົວ​ໄປ​ພ້ອມ​ກັນ ​ແຕ່​ຢ່າງ​ໜ້ອຍ​ພວກ​ເຮົາ​ກໍ​ຍັງ​ໄດ້​ຢູ່​ນຳ​ກັນ. ຫຼື​ວ່າ ຈະ​ເກີດ​ຫຍັງ​ຂື້ນ​ຖ້າ​ພວກ​ເຮົາ​ຊວນ​ກັນ​ໄປນັ່ງ​ດື່ມ​​ເບຍ​ກ່ອນ​ກັບ​ບ້ານ​ໃນ​ມື້​ນັ້ນ ຄື​ດັ່ງ​ທີ່​ພວກ​ເຮົາ​​ເຮັດ​ເປັນ​ປະຈຳ​ໃນ​ຊ່ວງ​ທ້າຍ​ອາທິດ. ​ເຊິ່ງອາດ​ຈະ..ອາດ​ຈະ.. ​ເຮັດ​ໃຫ້​ຄົນ​ທີ່​ລໍຖ້າ​ເອົາ​ຕົວ​ເຈົ້າ​ ອິດ​ເມື່ອຍກັບ​ການ​ລໍຖ້າຢູ່​ທີ່​ປ້ອມ​ຕຳຫຼວດ ພວກ​ເຂົາ​ອາດ​ຈ​ະ​ເມືອ​​ເຮືອນ​ກ່ອນ​ທີ່​ເຈົ້າ​ຈະ​ມາ​ເຖິງ​ປ້ອມ​ຕຳ​ຫຼວດ. ​ແນວ​ໃດ​ກໍ​ຕາມ ມື້​ນັ້ນ​​ແມ່ນ​ແລງ​ວັນ​ເສົາ ​ແລະ ຕຳຫຼວດ​ສ່ວນ​ຫຼາຍ​ກໍ​ກັບ​​ເລີກ​ວຽກ​ໄວ​ເພື່ອ​ກັບ​ບ້ານ. ​ເຈົ້າ​ອາດ​ຈະ​ລອດ​ຈາກ​ຊະ​ຕາ​ກຳ​ທີ່​ຮ້າຍ​ແຮງດັ່ງກ່າວ.

ສົມບັດ ຂ້ອຍ​ຮູ້​ວ່າບໍ່​ມີ​ປະ​ໂຫຍ​ດຫຍັງ​ທີ່​ຈະ​ຄິດ​ແບບ​ນີ້ ​ແຕ່​ຂ້ອຍ​ບໍ່​ສາມາດ​ອອກ​ຈາກ​ຄວາມ​ຄິດ​ນີ້​ໄດ້ ມັນ​ກັບ​​ເຂົ້າ​ມາ​ໃນ​ຫົວ​ຂ້ອຍ​ຊໍ້າ​ແລ້ວ​ຊ້ຳ​ອີກ.. ມັນ​ອາດ​ຈະ​ຢູ່ດັງ​ຢູ່​​ໃນ​ຫົວ​ຂ້ອຍ​​ໄປຕະຫຼອດ​ ຈົນ​ຮອດ​ມື້​ຕາຍ​. Continue reading “ເຖິງສົມບັດ…ຈາກ ຊຸຍມິງ (6)”

ອຶງຊຸຍເມັງບໍ່ລົດລະນຳຫາ ສາມີ

ວິທະຍຸເອເຊຍເສຣີ: 12 ທັນວາ 2014

FCCT-2014-12-11
ອຶງຊຸຍເມັງ(ຜູ້ທີສອງຈາກຂວາມື)ໃນກອງປະຊຸມ ຖແລງຂ່າວ ສື່ມວນຊົນ ຢູ່ບາງກອກ ປະເທດໄທ ວັນທີ 11 ທັນວາ

ຍານາງ ອຶງຊຸຍເມັງ ພັລຍາ ຂອງ ທ່ານ ສົມບົດ ສົມພອນ ນັກ ພັທນາ ຊຸມຊົນ ໃນລາວ ກ່າວ ໃນວັນ ຖແລງຂ່າວ ຕໍ່ ສື່ມວນຊົນ ຢູ່ ບາງກອກ ປະເທດໄທ ວັນທີ 11 ທັນວາ ວ່າ ຍານາງ ຈະເຮັດ ທຸກວິທີ ທາງ ເພື່ອ ສືບທາວຫາ ສາມີ ທີ່ ຖືກລັກພາ ຕົວໄປ ເກືອບ 2 ປີ ແລ້ວ. ຍານາງ ກ່າວວ່າ:

“ຂ້ອຍມີ ຄຳໝັ້ນ ສັນຍາ ຕໍ່ໂຕເອງ ແລະ ຕໍ່ຄອບຄົວ ຂອງ ສົມບັດ ຂ້ອຍ ຊິຊອກ ຈົນຮອດມື້ ຕາຍ ຖ້າວ່າບໍ່ໄດ້ ຄຳຕອບ ຂ້ອຍກໍຍັງ ຊອກຢູ່ ຈົນຮອດ ບໍ່ມີຊີວິດ ເລີຍ, ຂ້ອຍກໍຍັງ ບໍ່ຮູ້ ຕ້ອງຖ້າດົນ ປານໃດ ແຕ່ວ່າຂ້ອຍ ກ່າບໍ່ໄດ້ ສິ້ນສຸດ ການຖາມ ແລະ ການຮ້ອງຂໍ ຣັຖບາລ ລາວ”.

ກ່ອນວັນ ຄົບຮອບ 2 ປີ ວັນທີ 15 ທັນວາ ທີ່ ທ່ານ ສົມບັດ ສົມພອນ ຖືກລັກ ພາໂຕໄປ ນັ້ນ ຍານາງ ອຶງ ຊຸຍເມັງ ກໍໄດ້ໄປ ຮ່ວມການ ສົນທະນາ ກັບ ອົງກອນ ສິດທິ ມະນຸດ ສາກົນ ທີ່ ສຳນັກງານ ສະມາຄົມ ນັກຂ່າວ ຕ່າງ ປະເທດ ບາງກອກ ປະເທດໄທ. ຍານາງ ກ່າວຂອບໃຈ ບັນດາ ອົງກອນ ສາກົນ ແລະ ປະຊາຊົນ ທີ່ເຫັນໃຈ, ຜູ້ທີ່ໃຫ້ ກຳລັງໃຈ ແກ່ ຄອບຄົວ ທ່ານ ສົມບັດ ມາຕລອດ ໃນການ ຮ້ອງຮຽນ ໃຫ້ ທາງການ ລາວ ສືບສວນ ຊອກຫາ ທ່ານ ສົມບັດ. ຍານາງ ອຶງ ຊຸຍເມັງ ວ່າຍັງມີ ຄວາມຫວັງ ທີ່ ທ່ານ ສົມບັດ ຍັງມີ ຊີວິດ ຢູ່ບ່ອນໃດ ບ່ອນນຶ່ງ ແລະ ມື້ໃດ ມື້ນຶ່ງ ທ່ານ ຕ້ອງກັບຄືນ ບ້ານເຮືອນ ດ້ວຍຄວາມ ປອດພັຍ.

ຕາມ ຮູບພາບ ວີດີໂອ ນັ້ນ ທ່ານ ສົມບັດ ສົມພອນ ຖືກ ນຳໂຕໄປ ຢູ່ຕໍ່ໜ້າ ປ້ອມ ຕຳຣວດ ຫລັກ 3 ຖນົນ ທ່າເດື່ອ ນະຄອນ ຫລວງ ວຽງຈັນ. ທາງການ ລາວ ກໍວ່າໄດ້ ສືບສວນ ແລ້ວ ແຕ່ ທາງຄອບຄົວ ແລະ ອົງການ ສາກົນ ຕ່າງໆ ເຫັນວ່າ ບໍ່ເປັນທີ່ ແຈ້ງຂາວ ພໍ, ແລະ ຄວນເປັນ ຄວາມ ຮັບຜິດຊອບ ຂອງ ເຈົ້າໜ້າທີ່ ລາວ, ແຕ່ ທາງການລາວ ກໍກັບ ປະຕິເສດ ຕລອດມາ ວ່າ ບໍ່ໄດ້ມີ ສ່ວນພົວພັນ ນຳການ ຫາຍສາບສູນ ນັ້ນ ແຕ່ຢ່າງໃດ.

ຂ່າວ ກ່ຽວກັນ: ອຶງຊຸຍເມັງຍຶດໝັ້ນຊອກຫາ ຄຳຕອບ

ທ່ານຈະຮູ້ສຶກແນວໃດ?

ຖາມແທ້… ຢາກຮູ້ອີ່ຫຼີ… ຖ້າເປັນຄົນໃນຄອບຄົວທ່ານ ຫາຍຕົວໄປຈະຮູ້ສຶກແນວໃດ? ທ່ານຈະຮູ້ສຶກແນວໃດ ຖ້າຫາກວ່າ ຢູ່ດີໆມີຄົນເອົາຄົນໃນຄອບຄົວທ່ານໄປ ໂດຍບໍ່ຮູ້ສາເຫດ ແລ້ວຄົນໆ ນັ້ນກັບກາຍເປັນຄົນທີ່ ສັງຄົມຢ້ານກົວຂື້ນມາໂດຍບໍ່ຮູ້ຕົ້ນປາຍສາຍເຫດ…

ລຸງສົມບັດຫາຍໄປໃກ້ຈະຮອດສອງປີແລ້ວ ແຕ່ວ່າ ຂ່າວຄາວຍັງງຽບ ແຖມສັງຄົມຍັງຄົງຢ້ານກົວ ບໍ່ກ້າຮອດເວົ້າເຖິງຊື່ລາວ..ແມ້ແຕ່ຮ້ານຂາຍເຄື່ອງ ເຂົາກໍຍັງບໍ່ກ້າເວົ້າເຖິງຊື່ #ສົມບັດສົມພອນ.

ຖາມແທ້.. ຖ້າເປັນເຈົ້າ..ເຈົ້າຈະຮູ້ສຶກແນວໃດ? ໃກ້ຈະຮອດສອງປີແລ້ວ ຂະໜາດອົງກອນທີ່ເຮັດວຽກຄືກັນກັບເພິ່ນ … ທີ່ຮູ້ດີທີ່ສຸດວ່າວຽກເພິ່ນແມ່ນຫຍັງ… ຮູ້ດີທີ່ສຸດເພາະຫາກິນ ລ້ຽງຊີບດ້ວຍວຽກງານດຽວກັນກໍຍັງບໍ່ກ້າເວົ້າເຖິງ ຊື່ລຸງສົມບັດ ສັງຄົມເຮົາກຳລັງເກີດຫຍັງຂື້ນ?? ນ້ຳໃຈຂອງເຮົາຫາຍໄປໃສ?

ຄົນເຮົາທຸກຄົນມີຊີວິດເປັນຂອງຕົນເອງ ຢູ່ດີໆ ຈະຖືກບັງຄັບໃຫ້ບໍ່ມີຕົວຕົນໄດ້ບໍ? ຈະປ່ອຍໃຫ້ຄົນໜຶ່ງຫາຍໄປ ທັ້ງໆ ທີ່ຮູ້ວ່າບໍ່ແມ່ນເລື່ອງທີ່ຖືກຕ້ອງທີ່ຢູ່ດີໆ ຢາກມີຄົນມາເອົາໄປຊື່ໆ ແທ້ໆ ຫວະ? ເລື່ອງຄົນຫາຍມັນຄວນຈະເປັນ ເລື່ອງທຳມະດາບໍ? ຄວນເປັນເລື່ອງໃຜມັນບໍ? ລະຄອບຄົວຕ້ອງຮັບຜິດຊອບຄົນດຽວບໍ? ເຮົາບໍ່ໄດ້ເຮັດຫຍັງຜິດ ຕຳຫຼວດ ທະຫານກໍບໍ່ໄດ້ບອກວ່າເຮົາຜິດ ສານກໍບໍ່ໄດ້ວ່າເຮົາຜິດ ແລ້ວເປັນຫຍັງຕ້ອງຢ້ານທີ່ຈະເວົ້າເຖິງຊື່ #ສົມບັດສົມພອນ ລອງຄິດເບິ່ງດີໆ .. ຖ້າເລື່ອງນີ້ເປັນເລື່ອງທຳມະດາ ແລ້ວຄົນອື່ນໆ ຫາຍໄປກໍຈະເປັນ ເລື່ອງທຳມະດາເຊັ່ນກັນ

ແມ່ຍິງ 2 ຄົນເປີດເຜີຍບາດແຜ ທີ່ບໍ່ເຄີຍດີຂື້ນ, ບໍ່ເຄີຍຫາຍໄປ

The Philippine Inquirer: 20 ກໍລະກົດ 2014

​ໂດຍ ທາຣາ ຄຸຍ​ສມັນ​ໂດ (Tarra Quismundo)

620x413x20_2women.jpg.pagespeed.ic.kbRhDgxs_O
ສອງບຸກຄົນທີ່ຕົກໃນສະພາບດຽວກັນ ອິດິຕາ ເບີໂກສ ( Edita Burgos) ແລະ ອຶງ ຊຸຍມິງ (Ng Shui Meng) ໄດ້ພົບກັນໃນກອງປະຊຸມລະດັບໂລກກ່ຽວກັບການບັງຄັບໃຫ້ສູນຫາຍ. ໂຈອານ ບອນດອກ (JOAN BONDOC)

​ພວກ​ເຂົາ​ແມ່ນ​ຫົວ​ໃຈສອງ​ດວງ​ທີ່​ສ່ວນໜຶ່ຫາຍ​ໄປ ​​ແລະ​ຖືກ​ນຳ​ມາ​​ໂຮມ​​ເຂົ້າກັນ​ໂດຍ​ມີ​ເປົ້າ​ໝາຍ​ອັນດຽວ​ກັນ​ກໍ​ຄືວ່າ: ມື້​ໃດ​ມື້ໜຶ່ງຈະບໍ່​ມີ​ແມ່, ບໍ່​ມີ​ພັນ​ລະ​ຍາ, ບໍ່​ມີ​ໝູ່ ​ຫຼື ສະມາຊິກ​ຄອບຄົວຜູ້​ໃດ​ໄດ້​ສຳຜັດ​ກັບ​ເຫດການ​ເຊັ່ນ​ດຽວ​ກັນ​ກັບ​ພວກ​ເຂົາ ກໍ​ຄື​ຄ​ວາ​ມບໍ່​ແນ່ນອນ​ ​ແລະ “ທຸກ​ທໍລະມານ” ກັບ​ການ​ສູນ​ເສຍ​ຄົນ​ຮັກ​​ທີ່​ພວກ​ເຂົາ​ຕ້ອງ​ທົນຕໍ່​ໄປ​ເລື້ອຍໆ

ອີ​ດິຕາ ​ເບີ​ໂກສ (Edita Burgos),​ ຜູ້​ເປັນ​ແມ່​ຂອງໂຈ​ນາສ ​ເບີ​ໂກສ (Jonas Burgos)​ ນັກ​ເຄື່ອນ​ໄຫວ​ທີ່​ຫາຍ​ຕົວ​ໄປ ​ ​ແລະ ອຶງ ຊຸຍ​ມິ​ງ (Ng Shuimeng) ຊາວ​ສິງກະ​ໂປ ຜູ້​ເປັນ​ພັນ​ລະ​ຍາ ສົມບັດ ສົມ​ພອນ ​ນັກ​ພັດທະນາ​ຄົນ​ລາວ, ນັກ​ເສດຖະສາດ ​ແລະ ຜູ້​​ໄດ້ຮັບ​ລາງວັນຣາມອນ​ແມັກ​ໄຊ​ໄຊ. ​ແມ່​ຍິງທັງ​ສອງ​ໄດ້​ພົບ​ກັນ​​ເປັນ​ຄັ້ງ​ທຳ​ອິດ​​ເມື່ອ​ວັນ​ພະຫັດ​ທີ່​ກຸງ​ມະນີ​ລາ ​ແລະ ບັງ​ເອີນ​​ເປັນ​​ເພື່ອ​ນຮ່ວມ​ຫ້ອງ​ກັນ​​ໃນ​ລະຫວ່າງ​ກອງ​ປະຊຸມ 4 ມື້​ເຊິ່ງມີ​ເປົ້າ​ໝາຍ​ເພື່ອ​ຮຽກຮ້ອງ​ໃຫ້​ມີ​ການ​​​​ໃຫ້ການ​ຊ່ວຍ​ເຫຼືອແກ່ຄອບ​ຄົວ​ທີ່​ຜູ້​ສູນຫາຍ​ໃນ​ລະດັບ​ໂລກ

​ໃນ​ຂະ​ນະນີ້ ​ເບິ່ງ​ຄື​ວ່າ​ຢູ່​ຈຸດ​ສູງ​ທີ່​ສຸດ, ​ໂຊກ​ຊະຕາ​ໄດ້​ພາ​ໃຫ້​​ແມ່​ຍິງ​ສອງ​ຄົນ​ນີ້​ມາ​ພົບ​ພໍ້ກັນ ​ເຊິ່ງ​ຕ່າງ​ຄົນກໍມີ​ພາລະກິດ​ຊີວິດ​ກໍ​ຄື ການຊອກ​ຫາ​ຄົນ​ທີ່​ຫາຍ​ໄປ,​ ສ້າງ​ຄວາມ​ເຂົ້າ​ໃຈ​ກ່ຽວ​ກັບ​ຄອບຄົວ​ທີ່​​ສູນເສຍ​ພວກ​ເຂົາ​ໄປ, ​ແລະ​ຮຽກຮ້ອງ​ໃຫ້​ມີ​ການ​ດຳ​ເນີນ​ການ​ທົ່ວ​ໂລກ​​ເພື່ອ​ຕໍ່ຕ້ານ​ການ​ບັງຄັບ​​ໃຫ້​ສູນຫາຍ.

“ພວກ​​ເຮົາ​ໄດ້​​ຖືກຈັດ​ສັນ​ໃຫ້​ໄດ້​ພົບ​ກັນ. ຂ້ອຍ​ບໍ່​ເຊື່ອ​ວ່າ​ມັນ​ແມ່ນ​ຄວາມ​ບັງ​ເອີນ ຫຼື ​ໂດຍ​ບໍ່​ໄດ້​ຕັ້ງ​ໃຈ. ຂ້ອຍ​ເຊື່ອ​ວ່າ​ທຸກ​ສິ່ງ​ທຸກ​ຢ່າງ​​ແມ່ນ​ພົມລິຂິດ. ພ​ະ​ເຈົ້າ​ສົ່ງ​​ເຈົ້າ​ມາ​ນີ້​ຍ້ອນ​ວ່າມີ​ບາງ​ສິ່ງ​ທີ່​ເຈົ້າ​ສາມາ​ດ​ເຮັດ​ໄດ້ ​ແລະ ມີ​ບາງຢ່າງ​ດີໆ ຈະ​​ເປັນ​ຜົນ​ອອກ​ມາ​ຈາກ​ສິ່ງ​ໆ ນັ້ນ. ນີ້​ແມ່ນ​ມຸມ​ມອງ​ຂອງ​ຂ້ອຍ​ກ່ຽວ​ກັບ​ເລື່ອງ​ນີ້,” ​ເບີ​ໂກສ ​ໄດ້​ບອກ​ກ່າວກັບ​ຜູ້​ສອບ​ຖາມ

ທັງ​ສອງ​​ໄດ້​ເຂົ້າ​ຮ່ວມ​ໃນ​ກອງ​ປະຊຸມ​ລະດັບ​ຊາດ​ກ່ຽວ​ກັບ ການ​ໃຫ້​ຄວາມ​ຊ່ວຍ​ເຫຼືອ​ດ້ານຈິດ​ສັງຄົມ​​ໃຫ້​ກັບ​ຄ​ອບຄົວ​ຜູ້​ສູນ​ຫາຍ ​ແລະ ງານ​ດັ່ງກ່າວ​ໄດ້​ຈັດ​ຂື້ນ​ທີ່​ກຸງ​ມະນີ​ລາ ​ໂດຍສະຫະພັນ​ອາຊີ​ຕໍ່ຕ້ານ​ການ​ຫາຍ​ສູນຫາຍ​ໂດຍ​ບໍ່​ສະໝັກ​ໃຈ (the Asian Federation Against Involuntary Disappearances) ​ເຊິ່ງ​ເປັນ​ສະຫະພັນ​ກຸ່ມ​ສິດທິ​ມະນຸດ​​ໃນ​ລະດັບ​ພາກ​ພື້ນ​ທີ່​ກໍ່​ຕັ້ງ​ຂື້ນ​​ໃນ​ປະ​ເທດ​ຟິລິບ​ປິນ ປີ 1998.

“ຂ້ອຍໄດ້​ຍິນ​ກ່ຽວ​ກັບ​ເຫດການ​ດັ່ງກ່າວ ​ແລະ ກໍ​ໄດ້​ສວດ​ມົນ​ພາວະນາ​ໃຫ້​ລາວ… ​ເມື່ອຂ້ອຍ​ເຂົ້າ​ມາ​ໃນ​ຫ້ອງ​ນີ້, ຂ້ອຍ​ເຫັນລາວ​​ເປັນ​ຄົນ​ທີ່​ສະຫງ່າ​ງາມ​ຫຼາຍ. ຂ້ອຍ​ແນະນຳຊື່​ຕົນ​ເອງ ​ແລະ ກໍ​ເຫັນ​ຊື່​ຂອງ​ລາວ, ​ແລ້ວ ກໍ​ບອກລາວ​ວ່າ, ‘ຂ້ອຍ​ຂໍ​ໂທດ ຂ້ອຍ​​ເຫັນ​ເຈົ້າ​ທຳ​ອິດ ຂ້ອຍ​ຈື່​​ເຈົ້າບໍ່​ໄດ້,'” ​ເບີ​ໂກສກ່າວ​ໄວ້, ​ເລົ່າຄືນ​ມື້​ທີ່​ພົບ​ກັບ​ຊຸຍ​ມິ​ງ​ໃນມື້ທຳ​ອິດ​ຂອງ​ກອງ​ປະຊຸມ, ​ຕອນ​ເຊົ້າ​ວັນ​ພະຫັດ ທີ່ ​ໂຮງ​ແຮມ ​ເບ​ວິວ, ກຸງ​ມະນີ​ລາ.

ພວກ​ເຂົາທັງ​ສອງ​ໄດ້​ພັກ​ຢູ່​ຫ້ອງ​ດຽວ​ກັນ​ເປັນ​ເວລາ 4 ມື້.

Continue reading “ແມ່ຍິງ 2 ຄົນເປີດເຜີຍບາດແຜ ທີ່ບໍ່ເຄີຍດີຂື້ນ, ບໍ່ເຄີຍຫາຍໄປ”

ຢຸດການບັງຄັບໃຫ້ສູນຫາຍ, ພັນລະຍາ ຂອງຜູ້ໄດ້ຮັບລາງວັນຣາມອນ ແມັກໄຊໄຊໄດ້ກ່າວໄວ້

The Manila Post: 17 ກໍລະກົດ 2014

​ໂດຍ: ​​​ໄຈ​ມີ ອາ. ພິລາ​ພິລ (Jaime R. Pilapil)

ຊຸຍມິ​ງ ອຶງ,​ ພັນ​ລະ​ຍາ​ຂອງ ສົມບັດ ສົມ​ພອນ ​ຜູ້​ໄດ້​ຮັບ​ລາງວັນຣາມອນ​ແມັກ​ໄຊ​ໄຊ (Ramon Magsaysay)​ທີ່​​ຫາຍ​ຕົວ​ໄປ​ໃນ​ລາວ, ​​ໄດ້​ຮຽກຮ້ອງ​ໃຫ້​ລັດຖະບານ​ອອກ​ມາ​ດຳ​ເນີນ​ການ​ເພື່ອ​​ແກ້​ໄຂ​ບັນຫາ​ການ​ຫາຍ​ຕົວ​​ໄປ​ ທີ່​ປະ​ເທດ​ຟິລິບ​ປິນ.

ຊຸຍ​ມິ​ງ ​ເປັນ​ແຂກ​ຮັບ​ເຊີນ​ເພື່ອ​ກ່າວ​ໃນ​ງານ ປະຊຸມ​ຄັ້ງ​ທີ 3 ກ່ຽວ​ກັບ ການ​ໃຫ້​ຄວາມ​ຊ່ວຍ​ເຫຼືອ​ດ້ານຈິດ​ສັງຄົມ​ໃນ​ການ​ຊອກ​ຫາ​ຄວາມ​ຈິງ ​ແລະຄວາມ​ເປັນ​ທຳ​ໃຫ້​ກັບ​ຜູ້​ເຄາະ​ຮ້າຍ​ຂອງ​ການ​ບັງຄັບ​ໃຫ້​ສູນຫາຍ, ການ​ທໍລະ​ມານ ​ແລະ ການ​ຖືກ​ດຳ​ເນີນ​ການນອກ​ລະບົບ​ກົດໝາຍ (Third Conference on Psychosocial Support Disappearances, Torture and Extra-judicial Execution) ທີ່​ໂຮງ​ແຮມ ​ເບ​ວິວພາກ​ (Bayview Park Hotel) ​ໃນ ກຸງ​ມະນີ​ລາ.

ຈັດ​ໂດຍ ສະຫະພັນ​ອາຊີ​ຕໍ່ຕ້ານ​ການ​ຫາຍຕົວ​ໂດຍ​ບໍ່​ສະໝັກ​ໃຈ (AFAD)​, ຍາດ​ພີ່​ນ້ອງ​ຂອງ​ຜູ້​ທີ່​ສູນຫາຍ ​ເຊິ່ງ​ໃນ​ນັ້ນ​ມີ ທ່ານ​ນາງ ອິດິທາ ​ເບີ​ໂກ​ສ (Edita Burgos) ​ທີ່​ໄດ້​ເຂົ້າ​ຮ່ວມ​ໃນ​ງານ​ດັ່ງກ່າວ​ເຊັ່ນ​ກັນ. ​ເບີ​ໂກສ ​​ເປັນ​ແມ່​ຂອງ ​ໂຈ​ນາສ (Jonas) ທີ່​ຖືກ​ບັງຄັບ​ຕົວ​ໄປ​ໂດຍ​ໜ່ວຍງານທະຫານ​ໃນ​ວັນ​ທີ 28 ​ເມສາ 2007. ​ຈົນ​ຮອດ​ທຸກ​ມື້​ນີ້​ຍັງ​ບໍ່​ພົບ​ຕົວ​ໂຈ​ນາສ​ອີກ​ເລີຍ.

ຕັ້ງ​ແຕ່​ກົດ​​ໄອ​ຍະ​ການ​​ເສິກ​ໃນ​ປີ 1972 ​ໄດ້​ມີ​ລາຍ​ງານ​ໂຕ​ເລກ​ວ່າ​ມີ​ຜູ້​ສູນຫາຍ​ຈຳນວນ​ກວ່າ 2,000 ຄົນ, ຈຳນວນ​ຫຼາຍ​ກວ່າ 1,000 ຄົນ​ຖືກ​ກະທຳ​ໂຫດຮ້າຍ​ທາລຸນ ​ແລະ ຫຼາຍ​ຮ້ອຍ​ຄົນ​ທີ່​ຖືກ​ຂ້າ ​ເຊິ່ງ​ໃນ​ນັ້ນ​ກໍ​ລວມທັງ ການ​ສັງຫານ​ໝູ່ມາ​ກິນດາ​ເນົາ (Maguindanao) ​ໃນ​ເດືອນ​ພະຈິກ ປີ 2009.

ສົມບັດ ​ເປັນ​ຜູ້​ທີ່​ມີ​ບົດບາດ​​ເປັນ​ຜູ້ນຳພາໃນພາກ​ປະຊາ​ສັງຄົມ ​ເຊິ່ງ​ໄດ້​ຮັບ​ລາ​ງວັນ ຣາມອນ​ແມັກ​ໄຊ​ໄຊ ສາຂາ ຜູ້ນຳ​ຊຸມ​ຊົນ​ດີ​ເດັ່ນ ​ໃນ​ປີ 2005. ​ໃນ​ວັນ​ທີ 15 ທັນ​ວາ ປີ 2012, ​ໃນ​ພາບ​ບັນທຶກກ້ອງ​ວົງ​ຈອນ​ປິດ​ປາກົດ​ໃຫ້​ເຫັນ​ວ່າຕຳຫຼວດ​ລາວ​ໄດ້​ຢຸດ​ລົດ​ລາວ ​ແລະ ​ລາວ​ໄດ້​ຖືກ​ເອົາ​ຕົວ​ໄປ. ຫຼັງ​ຈາກ​ນັ້ນ​ກໍ​ບໍ່​ມີ​ໃຜ​ພົບ​ເຫັນ​ລາວ​ອີກ​ເລີຍ.

ຊຸຍ​ມິ​ງ ​ແລະ ຜູ້​ເຂົ້າ​ຮ່ວມ​ໃນ​ກອງ​ປະຊຸມ​ໄດ້​ຮຽກຮ້ອງ​​ໃຫ້​ລັດຖະບານ​ລາວ​ດຳ​ເນີນ​ການ​ສືບສວນ​ສອບ​ສວນ​ຢ່າງ​ຈິງ​ຈັງ ​ແລະ ​ເຮັດ​ທຸກ​ວິທີ​ທາງ​ເພື່ອ​ໃຫ້​ໝັ້ນ​ໃຈ​ວ່າ​ສົມບັດ​ຈະ​ໄດ້​ກັບ​ມາ​ຫາ​ຄອບຄົວ​ຢ່າງ​ປອດ​ໄພ.

Continue reading “ຢຸດການບັງຄັບໃຫ້ສູນຫາຍ, ພັນລະຍາ ຂອງຜູ້ໄດ້ຮັບລາງວັນຣາມອນ ແມັກໄຊໄຊໄດ້ກ່າວໄວ້”

ພວກເຮົາຕ້ອງການຄຳຕອບ, ຄວາມຈິງ, ແລະ ຄວາມເປັນທຳ

afad-logoສະຫະພັນ​ອາຊີ​ຕໍ່ຕ້ານ​ການ​ຫາຍຕົວ​ໂດຍ​ບໍ່​ສະໝັກ​ໃຈ (AFAD)​ ​ກຳ​ລັງ​ຈັດກອງ ປະຊຸມ​ຄັ້ງ​ທີ 3 ກ່ຽວ​ກັບ ການ​ໃຫ້​ຄວາມ​ຊ່ວຍ​ເຫຼືອ​ດ້ານຈິດ​ສັງຄົມ​ໃນ​ການ​ຊອກ​ຫາ​ຄວາມ​ຈິງ ​ແລະຄວາມ​ເປັນ​ທຳ​ໃຫ້​ກັບ​ຜູ້​ເຄາະ​ຮ້າຍ​ຂອງ​ການ​ບັງຄັບ​ໃຫ້​ສູນຫາຍ, ການ​ທໍລະ​ມານ ​ແລະ ການ​ຖືກ​ດຳ​ເນີນ​ການນອກ​ລະບົບ​ກົດໝາຍ​ ​ທີ່​ກຸງມະນີ​ລາ ​ໃນ​ລະຫວ່າງ​ວັນ​ທີ 17-20.

ຊຸຍ​ມິ​ງ​​ໃຫ້​ຂໍ້​ຄິດ​ເຫັນ​​ໃນຊ່ວງ​ຕອນ​​ເຊົ້າຂອງ​ມື້​ທຳ​ອິດ, ​ບາງ​ຕອນ​ກ່າວ​ໄວ້ດັ່ງ​ນີ້:

 ເຫດຜົນ​ທີ່​ວ່າ​ເປັນ​ຫຍັງ​ຂ້າພະ​ເຈົ້າ​ຈຶ່ງມາ​ຢູ່​ກັບ​ພວກ​ທ່ານ​ໃນ​ມື້​ນີ້ ​​ກໍຍ້ອນ​ວ່າ​ຂ້າພະ​ເຈົ້າ​ຍັງ​ຄົງ​ມີ​ຄວາມ​ຫວັງລາງໆ​ວ່າ​ຈະ​ສາມາດ​ຊອກ​ຫາຕົວສົມບັດ ​ແລະ ​ເອົາ​ລາວ​ກັບ​ມາ​ໄດ້. ​ແຕ່​ວ່າ ນອກຈາກ​ຄວາມ​ຈິງ​ທີ່​ວ່າຄວາມ​ຫວັງລາງໆນີ້​ເຮັດ​ໃຫ້​ຂ້າພະ​ເຈົ້າ​ສູ້​ຊົນ​ຕໍ່ ​ແລະ ​ເຮັດ​ໃຫ້​ຂ້າພະ​ເຈົ້າ​ລຸກ​ອອກ​ຈາກ​ບ່ອນ​ນອນ​ໃນ​ແຕ່​ລະ​ມື້ແລ້ວ ຂ້າພະເຈົ້າຍັງຮູ້ຂໍ້ເທັດຈິງທີ່ວ່າການ​ທີ່ຜູ້​ກະທຳ​ຜິດ​ໄດ້​ຮັບການ​ຍົກ​ເວັ້ນຈາກ​ການ​ລົງ​ໂທດ ​ແລະ ​ບໍ່ມີ​ຄວາມ​ຍຸດຕິ​ທຳ​ ​ແລະ ​ລະບົບ ​ແລະ ​ໂຄງ​ສ້າງ​ທີ່ລ້ວນປົກ​ປ້ອງ​ພວກ​ເຂົາ ພວກ​ເຂົາກໍ​ຈະ​ບໍ່ມີ​ທາງ​ສົນ​ໃຈ​ວ່າ​ພວກ​ເຮົາ​ຈະມີ​ຊີວິດ​ຢູ່ ​ຫຼື ​ບໍ່. ພວກ​ເຂົາ​ຈະ​ຮູ້ສຶກ​ຍິນ​ດີທີ່​ເຫັນ​ພວກ​ເຮົາ​ ຜູ້​ທີ່ຕົກ​ເປັນ​ຜູ້​ເຄາະ​ຮ້າຍ ຢູ່​ຢ່າງມິດ​ງຽບ​ແລ້ວ​ຖອຍຫ່າງອອກ​ໄປ ​ແລະ ນີ້​ກໍ​ເປັນ​ເຫດຜົນ​ທີ່​ວ່າ​ຍ້ອນ​ຫຍັງ​ພວກ​ເຮົາ ຜູ້​ເຄາະ​ຮ້າຍ ​ແລະ ສະມາຊິກ​ຄອບຄົວ​ຜູ້​ເຄາະ​ຮ້າຍ​ຈຶ່ງ​ບໍ່​ສາມາດ​ຢູ່​ງຽບໆ ​ແລະ​​​ ​ກໍຖອຍ​ອອກໄປຊື່ໆ. ພວກ​ເຮົາ​ຕ້ອງການ​ຄຳ​ຕອບ, ພວກ​ເຮົາ​ຕ້ອງການ​ຄວາມ​ຈິງ, ​ແລະ ພວກ​ເຮົາ​ຈຳ​ເປັນ​ຕ້ອງ​ມີ​ຄວາມ​ຍຸດຕິ​ທຳ

SM-AFAD ບລອກສົດ ​ແລະ ຂໍ້​ມູນ​ລາຍ​ລະອຽດ​ເພີ້​ມຕື່ມ​ກ່ຽວ​ກັບ​ກອງ​ປະຊຸມ​ສາມາດ​ເບິ່ງ​ໄດ້​ຢູ່​ບ່ອນ​ນີ.

ເຖິງ ສົມບັດ…ຈາກ ຊູຍມິງ (3)

ສົມບັດ​ທີ່​ຮັກ​,

SB-MOຂ້ອຍ​ຂຽນ​ເຖິງ​ເຈົ້າ​ເພື່ອ​ແຈ້ງ​ຂ່າວເສົ້າ ສະຫຼົດ​ໃຈ​ ມື້​ເຊົ້າ​ນີ້​ແມ່​ຜູ້​ເປັນ​ທີ່​ຮັກ​ແລະ​ເຄົາລົບ​ຂອງ​ເຈົ້າ​ໄດ້​​ເສຍ​ຊີວິດ​ແລ້ວ. ​ເປັນ​ເວລາ​ຫຼາຍ​ກວ່າ 6 ​ເດືອນທີ່​ສຸຂະພາບ​ຂອງ​ລາວ​​ຊຸດ​ໂຊມ​ ​ແລະ​ ​ເຖິງ​ວ່າ​ລາວ​ຈະ​​ອ່ອນ​ເພຍ ​ແຕ່​ລາວ​ໄດ້​ພະຍາ​ມຕໍ່ສູ້​ເພື່ອ​ໃຫ້​ມີ​ລົມ​ຫາຍ​ໃຈ​ຢູ່​ຕໍ່ ​​ຕັ້ງ​ຕາລໍ​ຖ້າ​​ເພື່ອ​ໃຫ້ໄດ້​ພົບ​​ເຈົ້າ​ຈົນ​ຮອດ​ນາ​ທີ​ສຸດ​ທ້າຍ.

​ແມ່​ຂອງ​ເຈົ້າ​ເປັນ​ໜຶ່ງ​ໃນ​ບັນດາບຸກຄົນ​ທີ່​ມີ​ຈິດ​ໃຈ​ດີ ​ແລະ ມີ​ເມດ​ຕາ​ທີ່​ສຸດ​ເທົ່າ​ທີ່​ຂ້ອຍ​ເຄີຍຮູ້ຈັກມາ ​ແລະ ມັນ​ກໍ​ຊັດ​ເຈນວ່າ​​ເຈົ້າ​ກັບ​ລາວ​ມີ​ສາຍ​​ໄຍ​ພິ​ເສດ​​ນີ້​. ຫຼາຍ​ຄັ້ງ​ທີ່​ຂ້ອຍ​ເຈົ້າ​​ເບີກ​ບ້ານ ​ເມື່ອ​ພວກ​ເຈົ້າ​ໄດ້ພົບ​ກັນ. ​ເນື່ອງ​ຈາກ​​ເຈົ້າ​ເປັນ​ລູກ​ຄົນ​ທຳ​ອິດ​ຂອງ​ລາວ ​​ແນ່ນອນ​ວ່າ​ເຈົ້າ​​ເປັນ​ແກ້ວຕາ​ດວງ​ໃຈ​ຂອງ​ລາວ​. ​​​ໃນ​ນາມ​ລູກ​ຊາຍ​ກົກ ​ເຈົ້າ​ເຫັນວ່າ​ມັນ​ແມ່ນໜ້າ​ທີ່​ຈະ​ຕ້ອງ​ແບ່ງ​ເບົາ​ຄວາ​ມທຸກຍາກ​ໃຫ້​ແກ່​ພໍ່​ແມ່​ໃຫ້​​ໄດ້ຫຼາຍ​ທີ່ສຸດ​ເທົ່າ​ທີ່​ຈະ​ເຮັດ​​ໄດ້. ​ເຈົ້າ​​ເລົ່າ​ໃຫ້​ຂ້ອຍ​ຟັງ​ເປັນ​ປະ​ຈຳວ່າແມ່​ເຈົ້າ​ຕ້ອງ​ເຮັດ​ວຽກ​ໜັກ​ສຳ່​ໃດ ​ໄປ​ພ້ອມໆ ກັບ​ລ້ຽງ​ດູລູກໆ. ​​​ເຈົ້າ​ເວົ້າ​ເຖິງ​ລາວ​ດ້ວຍ​ຄວາມ​ຮັກ​ແລະ​ເຄົາລົບ ​ແລະ​ເວົ້າ​ໃຫ້​ຟັງ​ເລື້ອຍໆ​ວ່າລາວ​ບໍ່​ເຄີຍ​ຈົ່ມ​ເຖິງ​​ແມ່ນ​ວ່າ​ຕົນ​ເອງ​ພົບ​ກັບ​ຄວາມ​ຍາກ​ລຳບາກຫຼາຍ​ສ່ຳໃດ ​ເຈົ້າ​ຄົງຈະ​ຊືມຊັບ​ເອົາ​​ລັກ​ຊະນະພິ​ເສດ​ຂອງ​ລາວ ກໍ​ຄື ຈິດທີ່​ອ່ອນ​ໂຍນ, ຄວາມມີ​ເມດ​ຕາ, ຄວາມອົດ​ທົດ,​​ແລະ ​ການ​​ເອົາ​ໃຈ​ໃສ່​ໃນ​ວຽກ​ງານ . Continue reading “ເຖິງ ສົມບັດ…ຈາກ ຊູຍມິງ (3)”

ຫ້າຮ້ອຍວັນທີ່ທ່ານສົມບັດຫາຍໄປ

ວິທະຍຸເອເຊຍເສຣີ: 29 ເມສາ 2014

ນາງ ອຶງ ຊຸຍເມັງ ພັລຍາ ຂອງທ່ານ ສົມບັດ ສົມພອນ ເດີນທາງມາ ສະຫະຮັຖ ອະເມຣິກາ ເພື່ອເຜີຍແພ່ ການ ຫາຍສາບສູນ ຂອງ ທ່ານ ສົມບັດ ສົມພອນ
ນາງ ອຶງ ຊຸຍເມັງ ພັລຍາ ຂອງທ່ານ ສົມບັດ ສົມພອນ ເດີນທາງມາ ສະຫະຮັຖ ອະເມຣິກາ ເພື່ອເຜີຍແພ່ ການ ຫາຍສາບສູນ ຂອງ ທ່ານ ສົມບັດ ສົມພອນ

ການຫາຍໄປ ຂອງ ທ່ານ ສົມບັດ ສົມພອນ ນັກ ພັທນາ ອາວຸໂສ ດີເດັ່ນ ຂອງລາວ ຜ່ານໄປ ເປັນເວລາ ຫ້າ ຮ້ອຍວັນ ແລ້ວ ກໍຍັງ ບໍ່ມີ ຮ່ອງຮອຍ, ແຕ່ວ່າ ຍານາງ ອືງ ຊຸຍເມັງ ຜູ້ເປັນ ພັລຍາ ກໍ ຍັງຄົງ ບໍ່ສິ້ນຫວັງ ແລະ ຍັງ ລໍຄອຍ ວ່າ ຜູ້ເປັນ ສາມີ ຈະກັບມາ.

ຍານາງ ອຶງ ຊຸຍເມັງ ໄດ້ ເດີນທາງ ມາ ສະຫະຮັຖ ອະເມຣິກາ ເພື່ອ ຕ້ອງການ ຢາກ ຈະເຜີຍແພ່ ໃຫ້ຄົນຢູ່ ປະເທດ ສະຫະຣັຖ ໄດ້ຮູ້ ກ່ຽວກັບ ການ ຫາຍສາບສູນ ຂອງທ່ານ ສົມບັດ ສົມພອນ ແລະ ຢາກຮ້ອງຮຽນ ໃຫ້ ຣັຖບານ ສະຫະຣັຖ ຊ່ວຍເຫລືອ ໃນ ເຣື້ອງນີ້. ຍານາງ ກ່າວຕໍ່ ນັກຂ່າວ ເອເຊັຍ ເສຣີ ທີ່ ນະຄອນ ຫລວງ ວໍຊິງຕັນ ດີຊີ ໃນວັນທີ 29 ເມສາ ວ່າ:

“ຮ້ອງຂໍ ຣັຖບານ ສະຫະຣັຖ ຖ້າເຮັດ ຊ່ວຍໄດ້ ຜັກດັນ ໃຫ້ລາວ ເນາະ ກະຊອກຫາ ສົມບັດ ຊອກຫາ ສົມບັດ ໃຫ້ເພີ່ນ ກັບຄືນ ສູ່ຄອບຄົວ ດ້ວຍຄວາມ ປອດໄພ”.

ທ່ານ ສົມບັດ ສົມພອນ ເປັນນັກ ພັທນາ ອາວຸໂສ ດີເດັ່ນ ຂອງ ລາວ ຈົນໄດ້ ຮັບຣາງວັນ ແມັກ ໄຊໄຊ ອາຫວອດ ປີ 2005. ອີງຕາມ ຫລັກຖານ ຈາກ ກ້ອງ ວົງຈອນປິດ, ທ່ານ ສົມບັດ ສົມພອນ ຖືກລັກ ພາຕົວ ໃນ ວັນທີ 15 ທັນວາ ປີ 2012 ເວລາ ປະມານ 18 ໂມງ ເຫດການ ເກີດຂຶ້ນ ໃນມື້ນັ້ນ ເມື່ອ ຣົດຂອງ ທ່ານ ຖືກ ເຈົ້າໜ້າທີ່ ຕຳຫຣວດ ຈະຣາຈອນ ຢຸດ ຢູ່ປ້ອມຍາມ ຕຳຫຣວດ ຕໍ່ໜ້າ ໂຮງຮຽນ ການຊ່າງ ລາວ- ເຢັຽຣະມັນ ຖະໜົນ ທ່າເດື່ອ ເຂດ ບ້ານວັດນາກ,  ເມືອງ ສີສັດຕະນາກ, ນະຄອນ ຫລວງ ວຽງຈັນ ຕໍ່ມາ ທ່ານໄດ້ລົງ ຈາກຣົດ ຍ່າງໄປກັບ ເຈົ້າໜ້າທີ່ ຕຳຫຣວດ ໄປໃນ ປ້ອມຍາມ ນັ້ນ ຈາກນັ້ນ ຕໍ່ມາ ມີຊາຍ ຄົນນຶ່ງ ຂີ່ລົດຈັກ ມາຈອດ ຢູ່ໃກ້ກັບ ປ້ອມຍາມ ຕຳຫຣວດ ແລ້ວ ແລ່ນເຂົ້າໄປ ໃນ ປ້ອມຍາມ ຈາກນັ້ນ ຊາຍຄົນນັ້ນ ກໍອອກ ມາຂັບຣົດ ຂອງ ທ່ານ ສົມບັດ ອອກໄປ.

ຕໍ່ມາ ບໍ່ດົນ ກໍມີຣົດ ກະບະ ສີເງິນ ຂັບມາ ພ້ອມດ້ວຍ ເປີດໄຟ ຂໍທາງ ແລ້ວມາຈອດ ຢູ່ ປ້ອມຍາມ ແລ້ວ ທ່ານ ສົມບັດ ກໍຖືກ ນຳຕົວຂຶ້ນ ຣົດຄັນນັ້ນ ແລ້ວກໍຂັບ ອອກໄປ ຫລັງຈາກ ນັ້ນ ກໍບໍ່ເຫັນ ທ່ານ ສົມບັດ ອີກ ເລີຍ. ນັບແຕ່ມື້ທີ່ ທ່ານ ສົມບັດ ສົມພອນ ຖືກລັກພາ ຕົວໄປ ຈົນມາເຖີງ ປັດຈຸບັນ ກໍຍັງ ບໍ່ມີຂ່າວ ຫຍັງ ກ່ຽວກັບ ທ່ານ ສົມບັດ ແລະ ບໍ່ຮູ້ວ່າ ຊະຕາກັມ ຈະເປັນ ແນວໃດ. ເຖີງຢ່າງໃດ ກໍຕາມ ຜູ້ ເປັນເມັຍ ກໍຍັງຄົງ ຈະສືບຕໍ່ ຊອກຫາ ທ່ານ ສົມບັດ ຕໍ່ໄປ ຍັງກ່າວ ອີກວ່າ:

“ຂ້ອຍກໍຕ້ອງ ຢູ່ເມືອງ ລາວ ເພື່ອ ຟັງຂ່າວ ແລະ ຊອກຫາ ສົມບັດ ມື້ໃດ ສົມບັດ ບໍ່ກັບບ້ານ ຂ້ອຍ ກໍຢູ່ລາວ ຂ້ອຍກໍຢາກ ຢູ່ລາວ ຖ້າ ສົມບັດ ກັບມາ”.

ການຫາຍຕົວໄປ ຂອງ ທ່ານ ສົມບັດ ສົມພອນ ຢູ່ຕໍ່ໜ້າ ປ້ອມ ຕຳຫຣວດ ນະຄອນ ຫລວງ ວຽງຈັນ ຖືວ່າ ເປັນ ກໍຣະນີ ການບີບ ບັງຄັບ ບຸກຄົນ ໃຫ້ ຫາຍສາບສູນ ແລະ ເປັນເຣື້ອງ ຣະເມີດ ສິດທິ ມະນຸດ ຢ່າງ ຮ້າຍແຮງ.

ພັນລະຍາ ທ່ານສົມບັດ ສົມພອນ ຍັງບໍ່ໄດ້ຮັບຂ່າວຄາວ ຈາກຜູ້ເປັນສາມີ ທີ່ຫາຍຕົວໄປ

Voice of America: 22 ເມສາ 2014

APF-02
ພາກປະຊາສັງຄົມ ທັງໃນອາຊຽນ ແລະນາໆຊາດ ໄດ້ພາກັນ ຮຽກຮ້ອງໃຫ້ ຊອກຫາ ທ່ານສົມບັດ.

ພັນລະຍາ ຂອງທ່ານສົມບັດ ສົມພອນ ຍັງບໍ່ໄດ້ຮັບຂ່າວຄາວໃດໆເລີຍຈາກຜູ້ເປັນສາມີທັງຍັງບໍ່ມີຄວາມຄືບໜ້າ ໃນການສອບສວນ ສືບສວນຫາຄວາມຈິງໂດຍທາງການຕຳຫຼວດລາວອີກດ້ວຍ.

ພາຍຫຼັງຈາກທີ່ ທ່ານນາງ Ng Shui Meng ພັນລະຍາ ຂອງ ທ່ານ ສົມບັດ ສົມພອນ ນັກພັດທະນາລາວ ຜູ້ດີເດັ່ນຂອງອາ ຊ່ຽນ ທີ່ໄດ້ຫາຍຕົວໄປ ນັບແຕ່ວັນທີ 15 ທັນວາ 2013 ເປັນຕົ້ນມານັ້ນ ໄດ້ຖະແຫລງການ ໃນໂອກາດການຫາຍຕົວໄປ ຂອງທ່ານສົມບັດ ຄົບຮອບ 1 ປີ ເພື່ອເຊີນຊວນ ໃຫ້ຜູ້ທີ່ຮັກ ຄວາມເປັນທຳ ທັງໃນລາວ ແລະຕ່າງປະເທດ ຈົ່ງໄດ້ພາກັນຂຽນຈົດໝາຍເຖິງ ທ່ານສົມບັດ ທີ່ມີເນື້ອຫາກ່ຽວກັບຊີວິດ ແລະ ຜົນງານ ແນວຄວາມຄິດ ອຸດົມການ ແລະ ວິທີການ ປະຕິບັດງານ ຂອງທ່ານສົມບັດ ເພື່ອເຜີຍແຜ່ອອກສູ່ການຮຽນຮູ້ ໃນວົງກວ້າງນັບແຕ່ ວັນທີ 15 ທັນວາ 2013 ເປັນຕົ້ນມາ ກໍປະກົດວ່າ ໄດ້ຮັບການຕອບສະໜອງຈາກ ພາກປະຊາສັງຄົມ ທັງໃນອາຊຽນ ແລະນາໆ ຊາດຢ່າງກວ້າງຂວາງ.

ທັງນີ້ໂດຍບັນດາຈົດໝາຍ ແລະ ການສະແດງອອກຕ່າງໆ ທີ່ກ່ຽວຂ້ອງກັບ ທ່ານສົມບັດ ດັ່ງກ່າວໄດ້ຖືກເຜີຍແຜ່ສູ່ ການຮັບຮູ້ໃນວົງກວ້າງໂດຍ Website ແລະ Facebook ທີ່ ຊື່ວ່າ Find Sombath Somphone ທີ່ມີທັງ ຈົດໝາຍ ການຈັດກິດຈະກຳ ແລະ ການ ສະແດງອອກ ທີ່ເປັນສັນຍາລັກ ຂອງການທວງຖາມ ອຳນາດການປົກຄອງ ໃນລາວ ກ່ຽວກັບການຫາຍຕົວໄປ ຂອງທ່ານສົມບັດ.

Members of Amnesty International Japan and Human Rights Watch protest at the Laos Embassy in Tokyo in December 2013. (Hideki Yakabayashi)
ເຄືອຂ່າຍອົງກອນ ພັດທະນາເອກະຊົນຍີ່ປຸ່ນ ຮຽກຮ້ອງໃຫ້ ຊອກຫາ ທ່ານສົມບັດ

ໂດຍການປະຕິບັດດັ່ງກ່າວນີ້ ກໍເພື່ອເປັນການສົ່ງກຳລັງໃຈ ແລະ ຄວາມປາດຖະໜາດີ ໄປເຖິງ ທ່ານສົມບັດ ທີ່ຫາຍຕົວໄປ ນັບເປັນລະຍະເວລາເກືອບ 500 ວັນມາແລ້ວ ຫາກແຕ່ວ່າຈົນ ເຖິງທຸກມື້ ສຳລັບທ່ານນາງ Ng Shui Meng ນັ້ນກໍຍັງຄົງ ບໍ່ໄດ້ຮັບຂ່າວຄາວໃດໆເລີຍ ຈາກຜູ້ເປັນສາມີ ຂອງທ່ານນາງ ແລະ ບໍ່ມີຄວາມຄືບໜ້າໃດໆ ເລີຍ ຈາກການສືບສວນສອບສວນ ຂອງທາງການຕຳຫຼວດລາວ ດັ່ງທີ່ທ່ານນາງໄດ້ກ່າວວ່າ:

“ສົມບັດ ເປັນຄົນສັນຊາດລາວ ລາວໄດ້ຫາຍໄປຢູ່ຕໍ່ໜ້າ ປົດຕຳຫຼວດ ໃນວຽງຈັນ ເລື້ອງທີ່ວ່າຜູ້ໃດເປັນ ຜູ້ຮັບຜິດຊອບ ໃນການ ເອົາລາວໄປນັ້ນບໍ່ສຳຄັນ ແຕ່ທີ່ສຳຄັນ ແມ່ນວ່າ ມັນຍັງແມ່ນຄວາມ ຮັບຜິດຊອບ ຂອງລັດຖະບານ ແລະ ຂອງກຳລັງຮັກສາຄວາມປອດໄພ ຢູ່ທີ່ຈະຊອກ ຫາ ສົມບັດ ໃຫ້ເຫັນແລ້ວສົ່ງລາວ ໃຫ້ຂ້າພະເຈົ້າ ແລະ ຄອບຄົວຢ່າງ ປອດໄພ ພວກເຂົາເຈົ້າ ໄດ້ຈັດຕັ້ງທີມງານສືບສວນຂຶ້ນມາ ແຕ່ກໍບໍ່ເຫັນວ່າມີຫຍັງດີເພາະເທົ້າເຖິງປັດຈຸບັນນີ້ ກໍບໍ່ໄດ້ມີຂ່າວຄາວອັນໃດວ່າ ສົມບັດ ຢູ່ແຫ່ງໃດ.”

ນອກຈາກການເຊີນຊວນໃຫ້ມີການ ຂຽນຈົດໝາຍເຖິງ ທ່ານສົມບັດ ດັ່ງກ່າວແລ້ວບັນດາອົງການ ຄຸ້ມຄອງ ສິດທິມະນຸດຍະຊົນສາກົນເຊັ່ນ ເຄືອຂ່າຍສະໝານສັນພາກປະຊາຊົນອາຊຽນ ຄະນະປະສານງານມະຫະກຳ ພາກປະຊາຊົນເອເຊຍກັບ ຢູໂຣບ ຄະນະກຳມະການປະສານງານ ອົງກອນພັດທະນາເອກະຊົນໄທ ເຄືອຂ່າຍ
ອົງກອນພັດທະນາເອກະຊົນຍີ່ປຸ່ນ ແລະ ເຄືອຂ່າຍເຍົາວະຊົນອາຊຽນກໍໄດ້ພາກັນ ຈັດກິດຈະກຳ ເພື່ອຮຽກຮ້ອງຂໍໃຫ້ ທາງການລາວຕາມຫາ ແລະ ໃຫ້ການຊ່ວຍເຫຼືອ ທ່ານສົມບັດ ຢ່າງຈິງຈັງອີກດ້ວຍ.

ກ່ອນໜ້ານີ້ ທ່ານ Walden Bello ຮອງປະທານ ຄະນະກຳມະການ ດ້ານສິດທິ ມະນຸດຍະຊົນ ຂອງລັດຖະສະພາ ອາຊຽນ ໄດ້ຖະແຫຼງການໃນໂອກາດທີ່ຄະນະຜູ້ ແທນຂອງລັດຖະສະພາຢູໂຣບ ຢ້ຽມຢາມ ສປປ. ລາວຢ່າງເປັນ ທາງການ ໃນວັນທີ 28 ຕຸລາ ປີ 2013 ວ່າຖືເປັນອີກໂອກາດນຶ່ງທີ່ຈະໄດ້ທວງຖາມທາງການລາວເຖິງ ຄວາມຄືບໜ້າ ຂອງການສືບສວນຫາຄວາມຈິງກ່ຽວກັບກໍລະນີ ຂອງທ່ານສົມບັດ.

People in Minneapolis are asking...
ນາໆ ຊາດພາກັນ ຮຽກຮ້ອງໃຫ້ ຊອກຫາ ທ່ານ ສົມບັດ

ຄະນະຜູ້ແທນຂອງລັດຖະສະພາຢູໂຣບ ທີ່ຢ້ຽມ ຢາມລາວ ດັ່ງກ່າວ ນຳໂດຍ ທ່ານ Werner Langen ປະທານ ລັດຖະສະພາຢູໂຣບຊຶ່ງ ຄະນະຂອງທ່ານກໍໄດ້ ພົບປະເຈລະຈາຮ່ວມ ກັນກັບ ຄະນະຜູ້ແທນ ຂອງສະພາແຫ່ງຊາດ ລາວ ທີ່ມີ ທ່ານໄຊ ສົມພອນ ພົມວິຫານຮອງ ປະທານສະພາ ແຫ່ງຊາດລາວເປັນຫົວໜ້າ ຄະນະໂດຍທັງ ສອງຝ່າຍ ກໍໄດ້ແລກປ່ຽນ ທັດສະນະ ຄວາມ ເຫັນທັງໃນດ້ານ ການພັດທະນາ ເສດຖະກິດ ສັງຄົມ ແລະ ສິດທິມະນຸດຍະຊົນ ທັງທີ່ເປັນ ການຮ່ວມມື ລະຫວ່າງສະພາແຫ່ງ ຊາດລາວ ກັບ ລັດຖະສະພາຢູໂຣບແລະ ລັດຖະສະພາຢູ່ໂຣບ ແລະ ລັດຖະສະພາອາຊຽນດ້ວຍ.

ແຕ່ຢ່າງໃດກໍຕາມ ສະມາຊິກລັດຖະສະພາຢູໂຣບ ກໍເຄີຍພົບປະເຈລະຈາ ກັບຄະນະເຈົ້າ ໜ້າທີ່ຂອງທາງການລາວ ຢູ່ນະຄອນວຽງຈັນມາ​ແລ້ວ​ ຄັ້ງນຶ່ງ​ເມື່ອ​ ເດືອນ​ສິງຫາ ປີກາຍ ​ໂດຍ​ຄະນະ​ຜູ້​ແທນ​ຂອງ​ລັດຖະສະພາ​ຢູ​ໂຣບກໍ​ໄດ້​ຢືນຢັນ​ວ່າ​ຈະ​ດຳ​ເນີນ​ມາດ​ຕະການ​ກົດ​ດັນ ຕໍ່​ລັດຖະບານ​ລາວຫຼາຍຂຶ້ນ​ໃນ​ກໍລະນີ​ຂອງ​ການ​ຫາຍ​ຕົວ​ໄປ​ ຂອງ​ທ່ານສົມບັດ ​ເພາະ​ເຫັນ​ວ່າ​ທາງ​ການ​ລາວ​ບໍ່​ໄດ້​ດຳ​ເນີນ​ການ​ຢ່າງ​ຈິງ​ຈັງ​ໃນ​ການຄົ້ນຫາ ​ຄວາມ​ຈິງ.

ທັງ​ນີ້​ໂດຍ​ກໍລະນີ​ທີ່​ສະທ້ອນ​ ໃຫ້​ເຫັນ​ເຖິງ​ຄວາມ​ບໍ່​ຈິງ​ຈັງ ຂອງ​ທາ​ງການ​ລາວ​ໄດ້​ຢ່າງ​ຈະ​ແຈ້ງ​ກໍ​ຄື​ການ​ທີ່​ບໍ່​ໄດ້​ໃຊ້​ປະ​ໂຫຍ​ດ ຈາກ​ພາບ​ທີ່​ກ້ອງ​ວົງ​ຈອນ​ປິດ​ຂອງ​ທາງ​ການ​ລາວ​ບັນ​ທຶກ​ໄ​ວ້​ໄດ້​ ໃນ​ຕອນ​ແລງ​ຂອງ​ວັນ​ທີ 15 ທັນ​ວາ 2012 ຊຶ່ງ​ເປັນ​ມື້​ທີ່​ ທ່ານ​ສົມບັດ ຖື​ກລັກ​ພາ​ຕົວ​ໄປ​ຈາກ​ປ້ອມ​ຕຳຫຼວດ​ ໃນ​ເຂ​ດນະຄອນ​ວຽງ​ຈັນ.