Al Jazeera: 16 ທັນວາ 2013
ສົມບັດ ສົມພອນ ຖືກລັກພາຕົວຈາກປ້ອມຕຳຫຼວດເມື່ອໜຶ່ງປີຜ່ານມາ, ແຕ່ລັດຖະບານລາວປິດງຽບຕໍ່ເຫດການດັ່ງກ່າວ.
ເຫດການລັກພາຕົວສົມບັດ ສົມພອນ, ອາຍຸ 61 ປີ, ທີ່ຖະໜົນສີ່ແຍກໃນນະຄອນຫຼວງຂອງປະເທດລາວ ເມື່ອວັນທີ 15 ທັນວາຂອງປີທີ່ຜ່ານມາ ໄດ້ຖືກບັນທຶກໄວ້ໃນກ້ອງວົງຈອນປິດຂອງລັດຖະບານ
ເຖິງວ່າຈະມີການຮຽກຮ້ອງຈາກລັດຖະບານປະເທດຕ່າງໆ ແລະ ບັນດາກຸ່ມສິດທິມະນຸດ ເພື່ອໃຫ້ໄດ້ຂໍ້ມູນກ່ຽວກັບການຫາຍຕົວໄປຂອງສົມບັດ ແຕ່ລັດຖະບານລາວໃນລະບອບຄອມມຸຍນິດຍັງຄົງມິດງຽບກ່ຽວກັບກໍລະນີດັ່ງກ່າວ.
“ປະເທດລາວໃນໄລຍະຫຼາຍປີມານີ້ມີຄວາມກ້າວໜ້າຫຼາຍ ເຫັນວ່າມີຄວາມຮັບຜິດຊອບໃນຖານະເປັນສ່ວນໜຶ່ງຂອງສັງຄົມສາກົນ ແຕ່ການລັກພາຕົວສົມບັດ ເປັນເລືອງທ້າທ້າຍຄວາມກ້າວໜ້າເຫຼົ່ານັ້ນ,” ລັດຖະມົນຕີວ່າການ ກະຊວງການຕ່າງປະເທດສະຫະລັດອາເມລິກາ, ທ່ານຈອນ ແຄຣີ, ກ່າວໄວ້ເມື່ອວັນອາທິດ.
“ພວກເຮົາຮຽກຮ້ອງໃຫ້ລັດຖະບານດຳເນີນການທຸກວິທີທາງທີ່ເປັນໄປໄດ້ ເພື່ອໃຫ້ໝັ້ນໃຈວ່າລາວຈະໄດ້ກັບມາຫາຄອບຄົວຂອງລາວຢ່າງປອດໄພ”
ພວກເຮົາ [ສະຫະລັດອາເມລິກາ] ຮຽກຮ້ອງໃຫ້ລັດຖະບານ [ປະເທດລາວ] ດຳເນີນການທຸກວິທີທາງເພື່ອໃຫ້ໝັ້ນໃຈວ່າລາວ [ສົມບັດ ສົມພອນ] ຈະໄດ້ກັບມາຫາຄອບຄົວລາວຢ່າງປອດໄພ,ກະຊວງການຕ່າງປະເທດສະຫະລັດ
ທ່ານເອກອັກຄະລາດຖະທູດ ເດນຽວ ຄລັນ (Daniel Clune) ເລີ່ມປະຈຳການຢູ່ທີ່ນະຄອນຫຼວງວຽງຈັນເມື່ອກາງເດືອນກັນຍາ, ໄດ້ກ່າວກັບ ອາຈາຊີຣາ ວ່າ ທາງການທູດໄດ້ຍົກປະເດັນກໍລະນີການຫາຍຕົວໄປກັບປະທານປະເທດລາວ ພະນະທ່ານ ຈູມມະລີ ໄຊຍະສອນ ໃນກອງປະຊຸມຜູ້ໃຫ້ທຶນ.
“ທ່ານປະທານປະເທດກ່າວໄວ້ວ່າ ທ່ານມີຄວາມກັງວົນເປັນທີ່ສຸດກ່ຽວກັບການຫາຍຕົວໄປ ແລະ ທາງລັດຖະບານກໍຈະສືບຕໍ່ຂະບວນການສືບສວນສອບສວນ,” ທ່ານ ຄລັນໃຫ້ຂໍ້ມູນກັບອາຈາຊີຣາ ຈາກນະຄອນຫຼວງວຽງຈັນ. “ພວກເຮົາເຊື່ອໝັ້ນໃນຄຳເວົ້າຂອງທ່ານປະທານປະເທດ. ພວກເຮົາຈະຍັງຄົງສືບຕໍ່ເປັນກັງວົນຕໍ່ຊະຕາກຳຂອງສົມບັດ”
ຄຳຖະແຫຼງການເມື່ອວັນອາທິດໄດ້ກ່າວໄວ້ວ່າສະຫະລັດມີຄວາມຍິນດີຕໍ່ຄວາມ “ເປັນກັງວົນ” ຂອງພະນະທ່ານ ຈູມມະລີ, ແຕ່ກໍຈະລໍຖ້າ “ຮຽນຮູ້ຈາກຜົນການສືບສວນສອບສວນສະບັບເຕັມ, ທີ່ລະອຽດ ແລະ ໂປ່ງໃສ”
ລັດຖະບານລາວບໍ່ໄດ້ໃຫ້ຄຳຕອບກັບ ອາຈາຊີຣາ ກ່ຽວກັບຄຳຮ້ອງຂໍເພື່ອຂໍຄຳຄິດເຫັນ. ເຊິ່ງໃນໄລຍະຜ່ານມາໄດ້ປະຕິເສດບໍ່ມີຂໍ້ກ່ຽວຂ້ອງກັບການຫາຍຕົວໄປຂອງນັກພັດທະນາຊຸມຊົນ.
ອົງການສິດທິມະນຸດສາກົນໄດ້ອອກຖະແຫຼງການເມື່ອວັນຈັນທີ່ຜ່ານມາ ຮຽກຮ້ອງໃຫ້ລັດຖະບານລາວໃຫ້ເປີດເຜີຍຊະຕາກຳຂອງສົມບັດໂດຍດ່ວນ, ຮຽກຮ້ອງໃຫ້ມີການສືບສວນສອບສວນຢ່າງເປັນທາງການກ່ຽວກັບການຫາຍຕົວໄປ.
“ໜຶ່ງປີທີ່ສົມບັດ ສົມພອນ ‘ຫາຍຕົວໄປ’, ມີຄວາມຊັດເຈນວ່າລັດຖະບານລາວຫວັງວ່າທົ່ວໂລກຈະລືມກ່ຽວກັບສິ່ງທີ່ເກີດຂື້ນກັບພົນລະເມືອງທີ່ມີຄວາມໂດດເດັ່ນ,” ກ່າວໂດຍ ຟິວ ໂຣເບີດສັນ, ຮອງຜູ້ອຳນວຍການພາກພື້ນອາຊີຂອງອົງການສິດທິມະນຸດສາກົນ.
“ຜູ້ໃຫ້ທຶນຈາກສາກົນທີ່ເຂົ້າຫາລັດຖະບານລາວ ຄວນຍົກກໍລະນີການຫາຍຕົວໄປຂອງສົມບັດໃຫ້ເປັນບູລິມະສິດອັນດັບໜຶ່ງ ຈົນກວ່າລາວຈະໄດ້ກັບຫາຄອບຄົວ”
ສົມບັດ ເປັນຜູ້ກໍ່ຕັ້ງ ແລະ ເປັນອະດີດຜູ້ອຳນວຍການສູນອົບຮົມຮ່ວມພັດທະນາ (Participatory Development Training Centre) ໃນປະເທດລາວ. ລາວເປັນບຸກຄົນທີ່ໄດ້ຮັບການເຄົາລົບຢ່າງກວ້າງຂວາງໃນເລື່ອງການສຶກສາ ແລະ ການພັດທະນາ ທັງໃນປະເທດລາວ ແລະ ທົ່ວອາຊີ. ໝາກຜົນຈາກການເຮັດວຽກຂອງສົມບັດແມ່ນ ການໄດ້ຮັບລາງວັນຣາມອນແມັກໄຊໄຊ (Ramon Magsaysay Award) ສາຂາຜູ້ນຳພາຊຸມຊົນ, ລາງວັນອັນຊົງກຽດທີ່ສຸດຂອງອາຊີ ເມື່ອປີ 2005.