Voice of America: 24 ທັນວາ 2014
ບັນດານັກປົກປ້ອງສິດທິມະນຸດສາກົນຈາກ 82 ອົງການ ຮ່ວມກັນຮຽກຮ້ອງຕໍ່ລັດຖະບານອາຊ່ຽນ ເພື່ອໃຫ້ກົດດັນລັດຖະບານລາວ ຕໍ່ກໍລະນີທີ່ ທ່ານສົມບັດ ສົມພອນ ໄດ້ຫາຍຕົວໄປເປັນເວລາກວ່າ 2 ປີແລ້ວນັ້ນ.
ບັນດານັກເຄື່ອນໄຫວ ເພື່ອປົກປ້ອງສິດທິມະນຸດຂອງ 82 ອົງການຈາກທົ່ວໂລກ ໄດ້ຮ່ວມກັນລົງນາມໃນຖະແຫລງການ ທີ່ໄດ້ສົ່ງເຖິງບັນດາ ລັດຖະບານຂອງປະເທດ ສະມາຊິກ ໃນກຸ່ມອາຊ່ຽນຢ່າງເປັນທາງການ ເມື່ອວັນທີ 15 ທັນວາ 2014 ທີ່ຜ່ານມາ ຊຶ່ງເປັນວັນຄົບຮອບ 2 ປີ ຂອງການຫາຍຕົວໄປຢ່າງບໍ່ມີຮ່ອງຮອຍຂອງທ່ານສົມບັດ ສົມພອນ ນັກພັດທະນາລາວທີ່ດີເດັ່ນຂອງອາຊ່ຽນ.
ໂດຍຖະແຫລງການດັ່ງກ່າວ ໄດ້ຮຽກຮ້ອງຂໍໃຫ້ລັດຖະບານ ຂອງທຸກປະເທດໃນອາຊ່ຽນ ຈົ່ງໄດ້ຮ່ວມກັນດຳເນີນມາດຕະການກົດດັນ ລັດຖະບານລາວຕໍ່ກໍລະນີ ທີ່ໄດ້ມີການລະເມີດສິດທິມະນຸດໃນລາວ ຢ່າງຮຸນແຮງ ທັງຍັງບໍ່ໄດ້ດຳເນີນມາດຕະການ ຢ່າງຈິງຈັງໃນການສືບສວນຫາຄວາມຈິງ ແລະຕິດຕາມຫາທ່ານສົມບັດ ທີ່ຖືກຄວບຄຸມຕົວໄປຈາກດ່ານຕຳຫລວດແຫ່ງໜຶ່ງໃນນະຄອນຫລວງວຽງຈັນ ນັບແຕ່ຕອນແລງວັນທີ 15 ທັນວາ 2012 ເປັນຕົ້ນມາ ແລະຈົນເຖິງປັດຈຸບັນນີ້ ກໍຍັງຄົງບໍ່ຮູ້ຊະຕາກຳຂອງ ທ່ານສົມບັດ ແຕ່ຢ່າງໃດ.
ບັນດາອົງການປົກປ້ອງສິດທິມະນຸດສາກົນ ໄດ້ໃຫ້ເຫດຜົນວ່າສາເຫດທີ່ລັດຖະບານອາຊ່ຽນທັງກຸ່ມ ຈະຕ້ອງກົດດັນຕໍ່ລັດຖະບານລາວນັ້ນ ກໍເພາະວ່າກໍລະນີການຫາຍຕົວໄປຂອງທ່ານສົມບັດນີ້ ບໍ່ໄດ້ເປັນພຽງບັນຫາພາຍໃນລາວເທົ່ານັ້ນ ຫາກແຕ່ຖືເປັນພາລະໜ້າທີ່ຂອງທັງກຸ່ມອາຊ່ຽນ ທີ່ຈະຕ້ອງຮ່ວມກັນ ເພື່ອຄົ້ນຫາຄວາມຈິງທີ່ເກີດຂຶ້ນໃນລາວ ທີ່ເປັນ
ປະເທດສະມາຊິກຂອງກຸ່ມອາຊ່ຽນດ້ວຍ ດັ່ງທີ່ທ່ານຈັກໄຊ ໂສມທອງດີ ນັກເຄື່ອນໄຫວພາກປະຊາສັງຄົມໃນອາຊ່ຽນ ໄດ້ໃຫ້ການອະທິບາຍວ່າ:
“ຂ້າພະເຈົ້າຄິດວ່າເລື້ອງນີ້ ບໍ່ແມ່ນເລື້ອງຂອງປະເທດລາວປະເທດດຽວ ເລື້ອງນີ້ເປັນເລື້ອງ ຂອງໜ້າທີ່ຂອງພູມິພາກນີ້ຮ່ວມກັນ ຄວາມຮັບຜິດຊອບຮ່ວມກັນ ຈຳເປັນ ທີ່ຈະຕ້ອງເກີດຂຶ້ນ ເພາະສະນັ້ນ ລັດຖະບານໄທ ແລະລັດຖະບານປະຊາຄົມອາຊ່ຽນ ຊຶ່ງຕອນນີ້ ເຮົາຊຸກດັນເປີດການຄ້າເສລີ ໜ້າຈະສະແດງອອກຈຸດຢືນເຫຼົ່ານີ້ຮ່ວມກັນ.”
ທາງດ້ານທ່ານນາງ Ng Shui Meng ພັນລະຍາຊາວສິງກະໂປຂອງທ່ານສົມບັດ ກໍໄດ້ຮຽກຮ້ອງຂໍໃຫ້ຜູ້ທີ່ຮັກຄວາມເປັນທຳທັງໃນລາວ ແລະຕ່າງປະເທດຈົ່ງໄດ້ພາກັນສືບຕໍ່ຂຽນຈົດໝາຍເຖິງທ່ານສົມບັດ ທີ່ມີເນື້ອຫາກ່ຽວກັບຊີວິດ ຜົນງານ ແນວຄິດ ອຸດົມການ ແລະວິທີການ ປະຕິບັດງານ ຂອງທ່ານສົມບັດ ເພື່ອເຜີຍແຜ່ອອກສູ່ການຮຽນຮູ້ຂອງເຍົາວະຊົນ ແລະສາທາລະນະຊົນ ໃນວົງກວ້າງຕໍ່ໄປ ຢ່າງບໍ່ຢຸດຢັ້ງ ໂດຍຖືວ່າເປັນກິດຈະກຳໜຶ່ງ ເພື່ອທວງຖາມຄວາມຍຸດຕິທຳ ໃຫ້ກັບທ່ານສົມບັດນັ້ນເອງ.
ທັງນີ້ໂດຍທ່ານນາງ Ng Shui Meng ໄດ້ຮຽນຮ້ອງວ່າ ການຂຽນຈົດໝາຍເຖິງທ່ານສົມບັດ ດັ່ງກ່າວຄວນມີເນື້ອຫາ ທີ່ສ້າງສັນ ຫຼື ສະແດງເຖິງຄວາມເປັນຫ່ວງເປັນໃຍ ແລະບໍ່ຄວນມີເນື້ອຫາດ້ານລົບ ຫຼືເປັນການກ່າວຫາຢ່າງບໍ່ສ້າງສັນພ້ອມກັນນີ້ ຜູ້ຂຽນຈົດໝາຍກໍຍັງຈະຕ້ອງລົງຊື່ກ່ອນທີ່ ຈະຖືກຄັດເລືອກໃຫ້ລົງເຜີຍແຜ່ໃນ Website ແລະ Facebook ທີ່ຊື່ວ່າ Find Sombath Somphone ຕໍ່ໄປ.
ນອກຈາກນີ້ ການປະຕິບັດດັ່ງກ່າວນີ້ ຍັງມີເປົ້າໝາຍເພື່ອເປັນການສົ່ງກຳລັງໃຈ ແລະ ຄວາມປາດຖະໜາດີໄປເຖິງ ທ່ານສົມບັດ ທີ່ຫາຍຕົວໄປເປັນເວລາກວ່າ 2 ປີມາແລ້ວ ແຕ່ວ່າ ສຳຫລັບ ທ່ານນາງ Ng Shui Meng ນັ້ນກໍຍັງຄົງມີຄວາມຫວັງ ແລະຄອງຄອຍຖ້າການກັບຄືນມາ ຂອງຜູ້ເປັນສາມີ ຢູ່ຕະຫລອດເວລາ.
ນອກຈາກການເຊີນຊວນໃຫ້ມີການຂຽນຈົດໝາຍເຖິງ ທ່ານສົມບັດ ດັ່ງກ່າວແລ້ວ ບັນດາອົງການຄຸ້ມຄອງສິດທິມະນຸດສາກົນ ເຊັ່ນເຄືອຂ່າຍສະໝານສັນພາກປະຊາຊົນອາຊ່ຽນ ຄະນະປະສານງານມະຫາະກຳພາກປະຊາຊົນເອເຊຍກັບຢູໂຣບ ຄະນະກຳມະການປະສານງານອົງກອນພັດທະນາເອກະຊົນໄທ ເຄືອຂ່າຍອົງກອນພັດທະນາເອກະຊົນຍີ່ປຸ່ນ
ແລະເຄືອຂ່າຍເຍົາວະຊົນອາຊ່ຽນ ກໍໄດ້ພາກັນຈັດກິດຈະກຳ ເພື່ອຮຽກຮ້ອງຂໍໃຫ້ທາງການລາວຕາມຫາ ແລະໃຫ້ການຊ່ວຍເຫຼືອ ທ່ານສົມບັດ ຢ່າງຈິງຈັງອີກດ້ວຍ.
ທັງນີ້ໂດຍກໍລະນີ ທີ່ສະທ້ອນໃຫ້ເຫັນເຖິງຄວາມບໍ່ຈິງຈັງ ຂອງທາງການລາວ ໄດ້ຢ່າງຊັດເຈນ ກໍຄືການທີ່ບໍ່ໄດ້ໃຊ້ປະໂຫຍດ ຈາກພາບທີ່ກ້ອງວົງຈອນປິດ ຂອງທາງການລາວບັນທຶກໄວ້ໄດ້ ໃນຕອນແລງຂອງວັນທີ 15 ທັນວາ 2012 ຊຶ່ງເປັນມື້ທີ່ ທ່ານສົມບັດ ຖືກລັກ ພາຕົວໄປຈາກປ້ອມຕຳຫລວດ ໃນເຂດນະຄອນຫລວງວຽງຈັນ.
ກ່ອນໜ້ານີ້ ພັນເອກ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບພາຍໃນ ໄດ້ໃຫ້ການຢືນຢັນໃນໂອກາດການຖະແຫລງຂ່າວຢ່າງເປັນທາງການຄັ້ງທີ 3 ກ່ຽວກັບກໍລະນີການຫາຍຕົວໄປຂອງທ່ານສົມບັດ ວ່າທາງການຕຳຫລວດລາວ ໄດ້ດຳເນີນການສືບສວນສອບສວນ ເພື່ອຄົ້ນຫາຄວາມຈິງກ່ຽວກັບກໍລະນີ ດັ່ງກ່າວນີ້ ຢູ່ເລື້ອຍມາ ຫາກແຕ່ວ່າ ກໍຍັງບໍ່ມີຄວາມຄືບໜ້າຢ່າງໃດເລີຍ ໃນຕະຫລອດລະຍະ ກວ່າ 2 ປີມານີ້.