ຖແລງການສິດທິມະນຸດ ຢູ່ລາວ

ຜູ້ຕາງໜ້າຣັຖບານ ອອສເຕຣເລັຽ ກໍໄດ້ພົບພໍ້ກັບ ມາດາມ ອື້ງ ຊຸຍ-ເມັ່ງ ພັລຍາ ທ່ານ ສົມບັດ ສົມພອນ

ວິທະຍຸເອເຊຍເສລີ: 03 ສິງຫາ 2017

ຣັຖບານອອສເຕຣເລັຽ ໄດ້ອອກຖແລງການ ຜ່ານເວັບໄຊທ ຂອງກະຊວງ ການຕ່າງປະເທສ ແລະການຄ້າ ເມື່ອວັນທີ 2 ສິງຫາ 2017 ນີ້. ໃນນັ້ນໄດ້ກ່າວເຖິງ ຣາຍລະອຽດ ຂອງກອງປະຊຸມຮ່ວມ ຣະຫວ່າງ ເຈົ້າໜ້າທີ່ ດ້ານສິທທິມະນຸສ ຂອງຣັຖບານ ອອສເຕຣເລັຽ ແລະ ຂອງ ຣັຖບານລາວ ພາຍຫລັງທີ່ ທັງ 2 ຝ່າຍໄດ້ ພົບພໍ້ກັນທີ່ ນະຄອນຫລວງ ວຽງຈັນ ເມື່ອວັນທີ 18 ແລະ 19 ກໍຣະກະດາ ທີ່ຜ່ານມາ.

ຜູ້ແທນດ້ານສິທທິມະນຸສ ທີ່ຕາງໜ້າໃຫ້ຣັຖບານອອສເຕຣເລັຽ ອັນມີທັງ ດຣ. Lachlan Strahan, ແລະ ດຣ. ທິມ ສຸດພົມມະສານ ໄດ້ພົບ ພໍ້ ດຣ. ບຸນເກີດ ສັງສົມສັກ, ຣັຖມົນຕີຣ ປະຈຳສຳນັກງານ ນາຍົກຣັຖມົນຕຼີ ແລະ ປະທານ ຄນະກັມມະການ ດ້ານສິທທິມະນຸສ ແຫ່ງຊາຕ ລາວ ທີ່ເປັນຫົວໜ້າ ຄນະຜູ້ແທນ ຣັຖບານລາວ, ໄດ້ປຶກສາຫາລື ກັນໃນວຽກງານ ດ້ານສິທທິມະນຸສ ຫຼາຍຢ່າງ ແລະທັງຮຽກຮ້ອງຣັຖບານ ລາວ ໃຫ້ນັບຖືສິທທິມະນຸສ, ສິດທິ ໃນການເຊື່ອຖື ສາສນາ ຕາມຫລັກການສາກົນ ທີ່ ຣັຖບານລາວ ໄດ້ຮ່ວມເປັນພາຄີ ໃນສົນທິ ສັນຍາ ຕ່າງໆ.

ນອກຈາກນີ້, ທາງການອອສເຕຣເລັຽ ຍັງຮຽກຮ້ອງ ໃຫ້ທາງການລາວ ແກ້ໄຂບັນຫາ ບຸກຄົນທີ່ຖືກບັງຄັບ ໃຫ້ຫາຍສາບສູນ ໂດຍສະເພາະ ກໍຣະນີ ທ່ານ ສົມບັດ ສົມພອນ, ນັກພັທນາຊຸມຊົນ ດີເດັ່ນທີ່ຖືກບັງຄັບ ໃຫ້ຫາຍສາບສູນ ເມື່ອທ້າຍປີ 2012, ຈົນມາຮອດມື້ນີ້ ກໍຍັງບໍ່ທັນ ມີຄວາມຄືບໜ້າໃດໆ ໃນການສືບສວນສວບສວນ. Continue reading “ຖແລງການສິດທິມະນຸດ ຢູ່ລາວ”

ສົມບັດ ທີ່ຮັກ…ຈາກ ຊຸຍເມັງ

ວິທະຍຸເອເຊຍເສລີ: 04 ມິຖຸນາ 2017

ສົມບັດ ທີ່ຮັກ,

ສຳລັບຫລາຍປະເທດ ໃນເອເຊັຽ ແລະ ອະເມຣິກາລາຕິ໋ນ, ສລອງວັນສາກົລ ເພື່ອຜູ້ຖືກບັງຄັບ ໃຫ້ຫາຍສາບສູນ ໃນສັປດານີ້. ຍ້ອນແນວນັ້ນ ຂ້ອຍຈຶ່ງຄຶດຮອດເຈົ້າ ຫລາຍຂຶ້ນຕື່ມ ໃນມື້ສຳຄັນ ຄືແນວນີ້.

ຄືນວານນີ້ ຂ້ອຍນອນຍາກ ເພາະຄຶດເຖິງເຈົ້າຫລາຍ, ແລະເຊົ້າມື້ນີ້ ຂ້ອຍຕື່ນຂຶ້ນມາ ແລະ ຮູ້ສຶກງຸດງິດໃຈ ຈົນບໍ່ເປັນອັນກິນອັນນອນ. ຂ້ອຍພຍາຍາມ ປອບໃຈໂຕເອງ ໂດຍການນັ່ງສະມາທິ ແຕ່ກໍຍາກ ທີ່ຈິດໃຈຂອງຂ້ອຍ ຈະຢູ່ໃນ ສະພາບສງົບ ປົກຕິ ບໍ່ກະວົນກະວາຍໄດ້ ເພາະວ່າ ມີສິ່ງທີ່ເຮັດໃຫ້ຂ້ອຍ ກັງວົນໃຈຢູ່. ຂ້ອຍເສົ້າໂສກ ແລະ ອາຣົມບໍ່ດີ ໃຈຮ້າຍ, ແລະ ທໍ້ແທ້ໃຈ. ຂ້ອຍຖາມໂຕເອງ ວ່າ ເຈົ້າເຮັດຫຍັງ… ສົມພອນ ຈຶ່ງໄດ້ຮັບ ຄວາມອະຍຸຕິທັມ ຄືແນວນີ້ ໃນເມື່ອ ທຸກສິ່ງທຸກຢ່າງ ທີ່ເຈົ້າເຮັດໄປ ທັງໝົດ ຄືຄວາມດີ, ເຈົ້າເປັນຄົນດີ, ທຸ້ມເທ ຄວາມຮູ້ ແລະ ຄວາມສຳນິສຳນານ ເຂົ້າໃນການປັບປຸງ ຊີວິດການເປັນຢູ່ ຂອງຊາວລາວ ທັມດາສາມັນ ແລະ ຊຸມຊົນລາວ ທົ່ວໄປ.
ຫລັງຈາກ ໄດ້ນັ່ງສະມາທິແລ້ວ ຈິດໃຈຂ້ອຍ ກໍເຢັນລົງ ແລະ ຮູ້ສຶກດີຂຶ້ນ ໜ້ອຍນຶ່ງ. ຂ້ອຍເຣີ່ມຄຶດເຖິງ ສິ່ງທີ່ເຈົ້າ ມັກເວົ້ານຳຂ້ອຍວ່າ ເຈົ້າບໍ່ເຄີຍພຍາຍາມ ທີ່ຈະປ່ຽນແປງໂລກ ຫຼື ປ່ຽນແປງຣັຖບານ ອັນເປັນສິ່ງທີ່ຢູ່ ນອກເໜືອ ໄປຈາກຄວາມສາມາດ ຂອງເຈົ້າ. ເຈົ້າເວົ້າວ່າ ເປົ້າໝາຍ ຂອງຊີວິດເຈົ້າ ມີພຽງແຕ່ຈະໄດ້ເຮັດສິ່ງ ເລັກໆນ້ອຍໆ ດ້ວຍວິທີການ ອັນນ້ອຍໆ ຄືນໃຫ້ ຄອບຄົວ ແລະ ຊຸມຊົນ ທີ່ໄດ້ລ້ຽງເຈົ້າ ໄດ້ເບິ່ງແຍງເຈົ້າ, ແລະ ສອນເຈົ້າ ໃຫ້ກາຍເປັນຄົນ ທີ່ເຈົ້າເປັນຢູ່ ໃນສູ່ມື້ນີ້. ແລະ ແນ່ນອນ ທັງໝົດນັ້ນ ເປັນສິ່ງທີ່ ເຈົ້າໄດ້ເຮັດ ຢູ່ເລື້ອຍໆ ຄື ແທນຄຸນງາມຄວາມດີ ໃຫ້ພວກເພິ່ນຄືນ ຢ່າງໝົດຈິດໝົດໃຈ ຖນອມທ່ອມຕົນ, ມ່ວນຊື່ນ ແລະ ໃຈກວ້າງ.

ຂ້ອຍໄດ້ເຫັນ ວິທີເຈົ້າເຮັດວຽກ ບໍ່ວ່າ ເຈົ້າຈະຢູ່ກັບ ຊາວນາທັມດາສາມັນ, ນາຍຄຣູ, ນັກຮຽນນັກສຶກສາ, ຄູ່ຮ່ວມພັທນາ ແລະ ເພື່ອນຮ່ວມງານ, ຫຼື ແມ່ນແຕ່ ຟັງເຈົ້າໜ້າທີ່ຂັ້ນສູງ ເຈົ້າກໍມັກ ປະຕິບັດ ຕໍ່ແຕ່ລະຄົນ ດ້ວຍຄວາມເຄົາຣົບ, ໃຫ້ກຽດ ແລະ ກ່ອນອື່ນໝົດ ເຈົ້າກໍພ້ອມ ທີ່ຈະຮັບຟັງ ຄົນອື່ນ ແລະ ມັກເວົ້າໜ້ອຍ. ນັ້ນເປັນວິທີ ທີ່ເຈົ້າ ມັກປະຕິບັດ ຕໍ່ຄົນອື່ນ ພ້ອມທັງ ເປີດຈິດເປີດໃຈ ແລະ ບໍ່ເຄີຍຖືໂຕເອງ ເປັນໃຫຍ່ຈັກເທື່ອ. ຂ້ອຍຄຶດວ່າ ຍ້ອນເປັນແນວນັ້ນ ເຈົ້າຈຶ່ງມີຄົນ ໃນຊຸມຊົນພັທນາ ແລະ ໃນບັນດາກຸ່ມຊາວໜຸ່ມ ຈຳນວນຫລາຍ ຢູ່ພາຍໃນປະເທດລາວ ແລະ ຕ່າງປະເທດ ປະຕິບັດຕາມ.

ໃນລະຍະສັປດານີ້ ຊຶ່ງເປັນສັປດາສາກົລ ເພື່ອຄົນ ທີ່ຖືກບັງຄັບ ໃຫ້ຫາຍສາບສູນ, ຂະນະທີ່ ພວກເຮົາ ຄຶດຮອດເຈົ້າ, ສົມບັດ, ແລະ ທຸກໆຄົນ ທີ່ຖືກບັງຄັບ ໃຫ້ຫາຍສາບສູນ, ຂ້ອຍພຍາຍາມ ທີ່ຈະລືມຄວາມທໍ້ແທ້ ເຫລືອໃຈ ແລະ ຄວາມໂສກເສົ້າ. ຂ້ອຍຈຶ່ງ ຈື່ຈຳ ຄວາມດີທັງໝົດ ທີ່ເຈົ້າໄດ້ເຮັດມາ. ຂ້ອຍເຊື່ອວ່າເຈົ້າ ຖືກບັງຄັບ ໃຫ້ຫາຍສາບສູນ ເນື່ອງຈາກວ່າ ເຈົ້າ ໄດ້ພຍາຍາມ ມີຊີວິດຕາມຫລັກການ ຂອງເຈົ້າແລະ ຄວາມຈິງໃຈ-ຊື່ສັດ ຂອງເຈົ້າ. ແລະນັ້ນ ຄືຄວາມດີ ຂອງເຈົ້າ ແລະ ແນວຄິດ ຂອງເຈົ້າ ທີ່ເອົາຜູ້ຄົນ ເປັນສູນກາງການພັທນາ ອັນປາກົດວ່າ ມັນເປັນ ສິ່ງທ້າທາຍ ຊຶ່ງໃນທີ່ສຸດ ກໍມີບາງຄົນ ປິດປາກເຈົ້າ ໂດຍໃຫ້ເຈົ້າ ຫາຍສາບສູນໄປ.

ສົມບັດ, ໃນຂະນະທີ່ຂ້ອຍ ມີຄວາມເຈັບປວດ ເມື່ອຂາດ ເຈົ້າຢູ່ນີ້, ຂ້ອຍຮູ້ວ່າ ວຽກງານຂອງເຈົ້າ ແລະ ສິ່ງທີ່ເຈົ້າຍຶດໝັ້ນວ່າ ຈະກະທຳເພື່ອນັ້ນ ຈະຍັງມີ ຊີວິດຊີວາຕໍ່ໆໄປ ສຳລັບ ຜູ້ຄົນ ທັງຄົນລາວ ແລະ ບໍ່ແມ່ນຄົນລາວ. ຂ້ອຍຈະຮຽກຮ້ອງ ຫາຄວາມຈິງ ແລະ ຄວາມຍຸຕິທັມ ສຳລັບເຈົ້າ ເຖິງແມ່ນວ່າ ທຸກສິ່ງ ທີ່ຂ້ອຍໄດ້ຮັບ ຄື ຝາແຫ່ງຄວາມມິດງຽບ ກໍຕາມ.
ສົມບັດ, ທີ່ຮັກ, ຈົ່ງຢູ່ຢ່າງແຂງແຮງ ແລະ ຂ້ອຍກໍຄືກັນ ຈະຢູ່ຢ່າງແຂງແຮງ ເພື່ອເຈົ້າ ແລະ ເພື່ອທຸກຄົນທີ່ຖືກບັງຄັບ ໃຫ້ຫາຍສາບສູນ.

ຮັກເຈົ້າຫລາຍ, ຊຸຍເມັງ.

ວັນ​ທີ 31 ເດືອນ​ພຶ​ສ​ພາ 2017

ພັນລະຍາ ທ່ານສົມບັດ ຮຽກຮ້ອງໃຫ້ ທາງການ ລາວ ບອກຄວາມຈິງ ກ່ຽວກັບ ສາມີທ່ານນາງ

ສຽງຂອງອາເມລິກາ: 22 ທັນວາ 2016

ພັນ​ລະ​ຍາ​ຂອງ​ຜູ້ນຳ​ນັກ​ເຄື່ອນ​ໄຫວສັງຄົມພົນລະ​ເຮືອນໃນ​ລາວ ທ່ານ​ສົມບັດ ສົມ​ພອນ ຮຽກຮ້ອງ​ໃຫ້​ມີ​ການ​ປະຕິ​ຮູບລະບົບ​ຕຸລາການໃນ​ລາວ ​ແລະ​ຂໍໃຫ້​ລັດຖະບານ​ໃຫ້​ຄວາມ

ກະຈ່າງ​ແຈ້ງ​ ກ່ຽວກັບ​ຊະ​ຕາ​ກຳ​ຂອງ​ສາມີ​ທ່ານ​ນາງ ​ໂດ​ຍທ່ານ​ນາງກ່າວ​ວ່າ ທ່ານ​ນາງ
“ຈະບໍ່ຍອມລົ້ມ​ເລີກ” ໃນ​ການສືບ​ຕໍ່​ຊອກຫາ​ຄວາມ​ຈິງ​ ທີ່ຢູ່​ເບື້ອງ​ຫຼັງ​ການ​ຫາຍ​ສາບ​ສູນ
​ໄປ​ຂອງ​ສາມີ​ທ່ານ​ນາງ.

ທ່ານ​ນາງ ອຶ້ງ ຊຸຍ​ເມັງ ​ໄດ້​ທຳ​ການ​ຮຽກຮ້ອງ​ດັ່ງກ່າວ​ໃນ​ຂະນະທີ່​ພວກ​ນັກ​ເຄື່ອນ​ໄຫວ​ເພື່ອ​ສິດທິ​ມະນຸດ ລະນຶກ​ເຖິງ​ວັນ​ຄົບຮອບ 4 ປີ ນັບ​ຕັ້ງແຕ່ ​ທ່ານ​ສົມບັດ ​ຖືກ​ບັງຄັບໃຫ້ ຫາ​ຍສາບ​ສູນ ທີ່ປ້ອມ​ກວດ​ຂອງ​ຕຳຫຼວດ​ໃນ​ນະຄອນຫຼວງ​ວຽງ​ຈັນ​ເມື່ອ​ເດືອນ​ທັນວາ​ປີ 2012​ ເປັນຕົ້ນ​ມາ.

ທ່ານ​ນາງ ອຶ້ງ ຊຸຍ​ເມັງ ​ໄດ້​ບອກ​ກັບ​ພວກ​ນັກ​ຂ່າວ​ທີ່ປະ​ເທດ​ໄທ​ວ່າ “ຂໍ້ຄວາມ​ທີ່ສົ່ງ​ໄປຫາ​ລັດຖະບານ​ລາວ​ນັ້ນ ​ແມ່ນ​ຂໍ​ໃຫ້​ເວົ້າຄວາມ​ຈິງ ບອກ​ພວກ​ເຮົາ​ຄວາມ​ຈິງ​ ແລະ​ຂໍ້ ຄວາມ​ຂອງ​ຂ້າພະ​ເຈົ້າ ​ທີ່​ສົ່ງ​ໄປ​ຫາລັດຖະບານ​ລາວນັ້ນ ກໍ​ແມ່ນ​ວ່າ ຂ້າພະ​ເຈົ້າ​ຈະ​ບໍ່​ ຍອມລົ້ມ​ເລີກ.” Continue reading “ພັນລະຍາ ທ່ານສົມບັດ ຮຽກຮ້ອງໃຫ້ ທາງການ ລາວ ບອກຄວາມຈິງ ກ່ຽວກັບ ສາມີທ່ານນາງ”

ງານລຳຣຶກເຖິງ ທ.ສົມບັດ

ວິທະຍຸເອເຊຍເສລີ: 16 ທັນວາ 2016

ສະມາຊິກຄອບຄົວ ແລະເຄືອຂ່າຍສູນອົບຮົມ ຮ່ວມພັທນາປາແດກ ຈັດງານລຳຣຶກ ເຖິງທ່ານສົມບັດ ສົມພອນ ໃນວັນຄົບຮອບ 4 ປີ ທີ່ທ່ານຖືກ ລັກພາຕົວ.

ຄອບຄົວຂອງ ທ່ານສົມບັດ ສົມພອນ ແລະເຄືອຂ່າຍ ສູນອົບ ຮົມຮ່ວມພັທນາ ຫຼື ສູນປາແດກ ໄດ້ຈັດງານລຳຣຶກ ເຖິງ ທ່ານສົມບັດ ສົມພອນ ທີ່ ນະຄອນຫຼວງ ວຽງຈັນ ໃນວັນທີ 15 ທັນວາ 2016 ພາຍຫຼັງທີ່ ທ່ານ ຖືກລັກພາໂຕໄປ ຄົບຮອບ 4 ປີເຕັມ. ໃນຕອນເຊົ້າ ຂອງງານ ຍານາງ ອຶ້ງຊຸຍເມັງ ພັລຍາຂອງທ່ານ ສົມບັດ ສົມພອນ ພ້ອມດ້ວຍຄອບຄົວ ກໍໄດ້ພາກັນ ຈັດພິທີ ທາງສາສນາ ຂຶ້ນເລັກນ້ອຍ, ໄດ້ນິມົນ ຄູບາມາສູຕ ຕາມຮີດຄອງ ຂອງຊາວພຸທ:

ຫຼັງຈາກນັ້ນ ຜູ້ຕາງໜ້າຄນະບໍຣິຫານງານ ຂອງສູນອົບຮົມ ຮ່ວມພັທນາແລະເຄືອຂ່າຍ, ທ່ານຄຳຜຸຍ ໄຊທະຣາຊ ກໍໄດ້ຂຶ້ນກ່າວ ເປີດງານ ລຳຣຶກເຖິງ ທ່ານສົມບັດ ສົມພອນ ແລະ ງານວາງສະແດງ ປາແດກ FAIR ຢ່າງເປັນທາງການ ໂດຍເວົ້າວ່າ:

“ທັງເໝິດນັ້ນແມ່ນເພື່ອເຮັດໃຫ້ ສັງຄົມລາວ ເປັນສັງຄົມ ທີ່ໜ້າຢູ່ ແລະ ເປັນສັງຄົມ ທີ່ມີຄວາມ ຍຸຕິທັມ. ແນ່ນອນແລ້ວ, ການທີ່ຈະ ອະທິບາຍ ຜົລງານ ຂອງອາຈານ ສົມບັດ ສົມພອນ ທີ່ມີຕໍ່ວຽກງານ ການພັທນາ ຢູ່ໃນເມືອງລາວນີ້, ຂ້າພະເຈົ້າ ບໍ່ມີຄວາມສາມາດ ທີ່ຈະອະທິບາຍ ໄດ້ໃນຂນະນີ້. ພ້ອມດຽວກັນນັ້ນ, ບັນດາການ ວາງສະແດງ ຕ່າງໆ ທີ່ພວກທ່ານເຫັນ ລ້ວນແລ້ວແຕ່ ສໍ່ສະແດງ ໃຫ້ ເຫັນຮູບພາບ ແລະ ຜົລງານ ຂອງອາຈານ ສົມບັດ ສົມພອນ, ຊິ່ງເປັນຜົລງານ ທີ່ຍັງຄົງຢູ່ ຕລອດໄປ”. Continue reading “ງານລຳຣຶກເຖິງ ທ.ສົມບັດ”

ລາວຈັດການກັບນັກວິຈານທາງສື່ສັງຄົມອອນລາຍ

Al Jazeera: 06 ມິຖຸນາ 2016 ໂດຍ Preeti Jha (unofficial translation)

ໃນການໂຈມຕີເທື່ອໃໝ່ ຕໍ່ກັບອິສະລະພາບໃນການປາກເວົ້າ, ລາວເຜີຍແຜ່ການຕັກເຕືອນຢ່າງໜັກ ຕໍ່ກັບຜູ້ຊົມໃຊ້ສື່ສັງຄົມອອນລາຍ.

Al Jazeera-June-2016
ສຸກັນ ໃຈທັດ ແລະ ສົມພອນ ພິມະສອນ ທາງໂທລະພາບແຫ່ງຊາດລາວ [Preeti Jha/Al Jazeera]
 ວຽງຈັນ, ລາວ – ປະຊາຊົນລາວ 3 ຄົນ ກົ້ມຫົວຂໍອະໄພຢ່າງງຽບໆ ຜ່ານໂທລະພາບແຫ່ງລັດ ຈາກການຫັກຫຼັງປະເທດໂດຍການໂພສ ຂໍ້ຄວາມຕໍ່ຕ້ານລັດຖະບານ ຜ່ານເຟສບຸກ, ເຊິ່ງເປັນການສະແດງໃຫ້ສາທາລະນະຊົນເຫັນ ຕໍ່ກັບການຍອມຮັບຜິດຢ່າງໂຈ່ງແຈ້ງ, ແລະເປັນການຈັດການກັບຄຳເຫັນຕໍ່ຕ້ານກັບລັດຖະບານຄອມມິວນິສ ຄັ້ງລ່າສຸດ.

ການເຜີຍແຜ່ທາງໂທລະພາບທີ່ມີບັນຍາກາດຫົດຫູ່ ໃນທ້າຍເດືອນພຶສະພາ ເປັນຂ່າວອັນທຳອິດຂອງທັງສາມ ສຳລັບຄອບຄົວທີ່ໃຈຈົດໃຈຈໍ່ລໍຖ້າຂ່າວວ່າພວກເຂົາຢູ່ໃສ ຕັ້ງແຕ່ທີ່ໄດ້ຖືກຈັບຕົວໃນເດືອນມີນາ.

“ແຕ່ນີ້ເປັນຕົ້ນໄປ ຂ້ານ້ອຍຈະປະຕິບັດຕົວດີ, ປ່ຽນແປງແນວຄິດ ແລະຍຸຕິທຸກກິຈະກຳທີ່ທໍລະຍົດຕໍ່ປະເທດຊາດ,” ທ້າວ ສົມພອນ ພິມະສອນ, ອາຍຸ 29 ປີ, ກ່າວຜ່ານໂທລະພາບລາວ.

ສົມພອນ ນັ່ງຢູ່ລະຫວ່າງກາງຂອງໝູ່ອີກສອງຄົນທີ່ຖືກກ່າວຫາ: ແຟນຂອງລາວ, ນາງ ລົດຄຳ ທຳມະວົງ, 30 ປີ, ແລະຊາຍອາຍຸ 32 ປີ ອີກຄົນໜຶ່ງ, ສຸກສັນ ໃຈທັດ, ເຊິ່ງແຕ່ລະຄົນໃສ່ຊຸດສີຟ້າ ສັນຍາລັກຂອງເຄື່ອງແບບນັກໂທດ.

ປະກົບໂດຍແຖວນາຍຕຳຫຼວດຫຼັງກົງ, ພາຍໃຕ້ປ້າຍຄຳຂວັນ “ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນ”, ສຸກັນ ຢ້ຳວ່າການສາລະພາບຂອງພວກເຂົາ ບໍ່ໄດ້ຖືກເຈົ້າໜ້າທີ່ບັງຄັບ. Continue reading “ລາວຈັດການກັບນັກວິຈານທາງສື່ສັງຄົມອອນລາຍ”

ມະນຸດຕ້ອງປົກປ້ອງທັມຊາດ

Logo-Humanity & Natureວິທະຍຸເອເຊັຍເສລີ: 18 ກຸມພາ 2016

ເຄືອຂ່າຍ ອົງການ ຈັດຕັ້ງ ທາງສັງຄົມ ຈາກ ຫຼາຍປະເທດ ໃນຂົງເຂດ ອາຊຽນ ທີ່ ເຂົ້າຮ່ວມ ງານເສວະນາ ເຣື້ອງ ຄວາມສັມພັນ ຣະຫວ່າງ ມະນຸດ ກັບ ທຳມະຊາດ ຊຶ່ງ ຈັດຂຶ້ນ ຢູ່ ຈຸລາລົງກອນ ມະຫາວິທຍາລັຍ ປະເທດໄທ ໃນ ວັນທີ 17 ກຸມພາ 2016 ເຫັນພ້ອມ ນໍາກັນວ່າ ມະນຸດ ຕ້ອງປົກປັກ ຮັກສາ ທັມຊາດ.

ຍານາງ ອຶງ ຊຸຍເມັງ ພັລຍາ ຂອງທ່ານ ສົມບັດ ສົມພອນ ຜູ້ກໍ່ຕັ້ງ ສູນ ອົບຮົມ ຮ່ວມພັທນາ ຫຼື PADETC ໃຫ້ສຳພາດ ກັບ ວິທຍຸ ເອເຊັຽເສຣີ ຢູ່ໃນງານ ເສວະນາ ນັ້ນວ່າ ມະນຸດ ກັບ ທຳມະຊາດ ບໍ່ສາມາດ ແຍກອອກ ຈາກກັນໄດ້ ແລະ ມະນຸດ ຕ້ອງປົກປັກ ຮັກສາ ທຳມະຊາດ:

“ມະນຸດ ເປັນສ່ວນນຶ່ງ ຂອງ ທຳມະຊາດ ອັນນີ້ ກໍຜ່ານ ປະສົບການ ຊີວິດ ຂອງ ສົມບັດ ເອງ ເພາະວ່າ ເພິ່ນເປັນ ລູກຊາວນາ, ເຂົ້າ ກໍມາແຕ່ດິນ, ດິນ ກໍຕ້ອງ ອາສັຍນ້ຳ, ມີນ້ຳ ມີເຂົ້າ ມີປາ ຈຶ່ງມີອາຫານ ລໍ່ລ້ຽງຊີວິດ, ປ່າໄມ້ ໄດ້ໄມ້ ຈຶ່ງໄດ້ ເຮືອນຊານ. ເພິ່ນຢາກໃຫ້ ຄົນລຸ້ນໃຫມ່ ນຶກເຖິງ ບຸນຄຸນ ຂອງ ທຳມະຊາດ”. Continue reading “ມະນຸດຕ້ອງປົກປ້ອງທັມຊາດ”

ຄອບຄົວທ່ານສົມບັດຂໍຄວາມ ເປັນທັມ

ວິທະຍຸເອເຊຍເສຣີ: 16 ທັນວາ 2015

2015-12-15-SSBP-01
(ຊ້າຍມື) ຫຼານສາວຂອງທ່ານ ສົມບັດ ສົມພອນ ຖັດໄປແມ່ນ ຍານາງເປມຣຶດີ ດາວເຮືອງ ຜູ້ຕາງໜ້າ ອົງກອນ TERRA

ຫລານສາວ ຂອງ ທ່ານ ສົມບັດ ສົມພອນ ຮຽກຮ້ອງ ທາງການລາວ ໃຫ້ຄວາມ ເປັນທັມ ໃນການ ສືບສວນ ສອບສວນຫາ ທ່ານ ສົມບັດ ຕື່ມອີກ ເພາະຕລອດ 3 ປີ ຜ່ານມາ ການສືບສວນ ສອບສວນ ຂອງ ເຈົ້າໜ້າທີ່ ຕຳຣວດ ບໍ່ມີຄວາມ ຄືບໜ້າ ເລີຍ, ເຮັດໃຫ້ ຄອບຄົວ ທ່ານ ສົມບັດ ຄິດວ່າ ບໍ່ໄດ້ຮັບ ຄວາມເປັນທັມ, ແຕ່ກໍບໍ່ ໄດ້ຈົ່ມເຖິງ ການເຮັດວຽກ ຂອງ. ດັ່ງ ນາງກ່າວ ຕອນນຶ່ງ ວ່າ:

“ຖາມວ່າ ມັນ ຍຸຕິທັມ ບໍ່ ຮອດທຸກມື້ນີ້ ກະຄຶດວ່າ ມັນບໍ່ ຍຸຕິທັມ ເພາະວ່າ ເປັນ ປະຊາຊົນ ເຮົາເພິ່ງໃຜ ບໍ່ໄດ້ ແຕ່ວ່າຖາມວ່າ ເຮົາໄປ ດູຖູກ ເພິ່ນບໍ່ ຫລື ວ່າຈັ່ງໃດ ພວກເຮົາ ກະບໍ່ ເພາະເຮົາ ກະຄຶດວ່າ ມັນກະ ມີເຫດ ມີຜົລ ແຕ່ລະຄົນ ມີຫຼາຍໆຢ່າງ ທີ່ວ່າ ຕິດຂັດ ຫລື ອາຈຈະບໍ່ ສາມາດ ເຮັດໄດ້ ເຮົາ ກະບໍ່ຮູ້ ເຮົາກະ ພຍາຍາມ ເຂົ້າໃຈ ເພິ່ນ ຄືກັນ”.

ພ້ອມດຽວກັນ ນັ້ນ ນາງ ກໍຢາກ ຮຽກຮ້ອງ ຄົນໃນສັງຄົມ ໃຫ້ກຳລັງໃຈ ແກ່ ຄອບຄົວ ທ່ານ ສົມບັດ ຕໍ່ໄປ ເພາະ ຕົນເຫັນວ່າ ຂນະນີ້ ປະຊາຊົນ ສ່ວນໃຫຍ່ ບໍ່ຢາກ ເຂົ້າມາຫາ ຫລື ພົວພັນ ກັບຄອບຄົວ ທ່ານ ສົມບັດ ເພາະຢ້ານ ຈະເກີດຄວາມ ເດືອດ ຮ້ອນ ຕາມມາ. ແລະວ່າ ຢາກໃຫ້ ສັງຄົມ ເຂົ້າໃຈວ່າ ເມື່ອ ຄອບຄົວ ນຶ່ງ ມີ ສະມາຊິກ ໃນຄອບຄົວ ຂອງຕົນ ຖືກລັກ ພາຕົວໄປ ກໍເປັນເຣື່ອງ ປົກຕິ ທີ່ ຕ້ອງຕາມຫາ ແລະ ຫາຄວາມ ເປັນທັມ. Continue reading “ຄອບຄົວທ່ານສົມບັດຂໍຄວາມ ເປັນທັມ”

ທາງການລາວບໍ່ສົນໃຈເຣື້ອງ ທ.ສົມບັດ

ວິທະຍຸເອເຊຍເສຣີ: 13 ກັນຍາ 2015

FCCT-15-09-11
ກອງປະຊຸມ ກ່ຽວກັບ ທ່ານ ສົມບັດ ສົມພອນ ໃນຫົວຂໍ້ທີ່ວ່າ ”1000 ມື້ ທີ່ບໍ່ມີ ຄວາມຍຸທຕິທັມ” ຈັດຂຶ້ນຢູ່ ບາງກອກ ປະເທດໄທ RFA

ໃນ ກອງປະຊຸມ ກ່ຽວກັບ ການ ຫາຍສາບສູນ ຂອງ ທ່ານ ສົມບັດ ສົມພອນ, ໃນ ຫົວຂໍ້ ທີ່ວ່າ ”1000 ມື້ ທີ່ ບໍ່ມີຄວາມ ຍຸທຕິທັມ” ທີ່ ຈັດຂຶ້ນ ຢູ່ ບາງກອກ ປະເທດ ໄທ, ໂດຍ ສະຫະພັນ ສິດທິ ມະນຸດ ສາກົນ ແລະ ສົມບັດ Initiative, ໃນ ວັນທີ 11 ກັນຍາ ປີ 2015 ຣະບຸ ວ່າ.

ທາງການ ລາວ ຍັງບໍ່ມີ ຄວາມ ຄືບຫນ້າ ກ່ຽວກັບ ການ ຫາຍສາບສູນ ຂອງ ທ່ານ ສົມບັດ ສົມພອນ ໃຫ້ ພັລຍາ ແລະ ຄອບຄົວ ຂອງ ທ່ານ ຮູ້ ແລະ ບໍ່ມີ ແນວທາງ ການສືບສວນ ຫາ ບຸກຄົນ ຫາຍສາບສູນ ເປັນໄປ ຕາມ ກົດໝາຍ ສາກົນ.

ທ່ານ Kingsley Abbott ທີ່ ປຶກສາ ກົດໝາຍ ຣະຫວ່າງ ປະເທດ ຈາກ ຄນະ ກັມມະການ ນິຕິສານ ສາກົນ ກ່າວວ່າ, ຣັຖບານ ລາວ ຕ້ອງ ສືບສວນ ຄະດີ ດັ່ງກ່າວ ໂດຍໄວ ແລະ ຍຸທຕິທັມ, ແລະ ໃຫ້ ແຈ້ງ ຄວາມຄືບຫນ້າ ຂອງການ ສືບສວນ ຕໍ່ ຄອບຄົວ ຂອງ ທ່ານ ສົມບັດ. ທີ່ ຜ່ານມາ ຣັຖບານ ລາວ ຍັງບໍ່ໄດ້ ເຮັດ ຫນ້າທີ່ ນີ້ ຢ່າງ ເຕັມທີ່ ແລະ ເວົ້າວ່າ ກໍຣະນີ ການ ຫາຍສາບສູນ ຂອງ ທ່ານ ສົມບັດ ສົມພອນ, ບໍ່ຄວນ ມີດງຽບ ຈາກ ສັງຄົມ.ດັ່ງທ່ານ ກ່າວວ່າ:

“ໃຫ້ ສືບສວນ ແລະ ຕິດຕາມ ຄະດີ ດັ່ງກ່າວ, ໃຫ້ ສື່ມວນຊົນ ແລະ ນານາຊາດ ຮູ້ວ່າ ການ ບີບບັງຄັບ ການ ຫາຍສາບສູນ ຍັງບໍ່ຖືກ ຫລົງລືມ ແລະ ໃຫ້ ທາງການ ລາວ ກັບມາ ສືບສວນ ຄະດີ ນີ້ ອີກໃຫມ່”. Continue reading “ທາງການລາວບໍ່ສົນໃຈເຣື້ອງ ທ.ສົມບັດ”

ລາງວັນພິເສດສຳລັບ ສົມບັດ

SB in Japan 2008bມື້ນີ້ຂ້າພະເຈົ້າຢືນຢູ່ຕໍ່ໜ້າບັນດາທ່ານດ້ວຍຄວາມເຄົາລົບ ແລະ ດ້ວຍຄວາມໂສກເສົ້າເລັກນ້ອຍທີ່ເປັນ ຂ້າພະເຈົ້າຜູ້ທີ່ມາຮັບ ລາງວັນພິເສດເພື່ອສິດທິມະນຸດນີ້ ແທນທີ່ຈະເປັນ ສົມບັດ ຜູ້ເປັນສາມີຂອງຂ້າພະເຈົ້າ ເຊິ່ງໂອກາດແບບນີ້ຈະເຕັມປ່ຽມໄປ ດ້ວຍຄວາມສຸກ ແລະ ມີກຽດຫງ່າທີ່ສຸດຖ້າຫາກສົມບັດ ໄດ້ ມາຮັບລາງວັນນີ້ດ້ວຍຕົວລາວເອງ ແຕ່ກໍໜ້າເສຍດາຍທີ່ ສະຖານະການບໍ່ເອື້ອອຳນວຍ. ສົມບັດໄດ້ຖືກບັງຄັບໃຫ້ຫາຍ ຕົວໄປຕໍ່ໜ້າປ້ອມຕຳຫຼວດເມື່ອສອງປີກ່ອນ…

…ສົມບັດ ​ເວົ້າ​ຕະຫຼອດ​ວ່າການ​ພັດທະນາ ​ແລະ ຄວາມ​ກ້າວໜ້າ​ບໍ່​​ສາມາດ​ເກີດ​ຂື້ນ​ໄດ້​​ໂດຍ​ການ​ນຳ​ໃຊ້​ແຕ່ ຄວາມ​ຮູ້​ທາງ​ວິຊາ​ການ ​ແລະ ວິທະຍາສາດ​​ເທົ່າ​ນັ້ນ ​ແຕ່​ຕ້ອງ​ມີຮາກ​ຖານ​ມາຈາກ​ຄຸນຄ່າ​ທາງ​ຈິດ​ໃຈ ກໍ​ຄື​ຄວາມມີ​ເມ​ດຕາ, ຈິດ​ໃຈ​ທີ່ອ່ອນ​ໂຍນ, ການ​ເຄົາລົບນັບຖື​ຕໍ່​ສິ່ງຊີວິດຕ່າງໆ (ທັງ​ມະນຸດ ​ແລະ ສັດ) ​ແລະ ​ຕໍ່​ທຳ​ມະ​ຊາດ.

​ຈາກ ບົດ​ກ່າວ​ຂອງ ນາງ ອຶງ ຊຸຍ​ມິ​ງ ໃນ​ງານ​ມອບ​-ຮັບ ລາງວັນ​ກວາງ​ຈູ ​ຈາກມູນ​ນິທິ​ສິບ​ແປດ​ພຶດສະພາ

ເຖິງສົມບັດ…ຈາກ ຊຸຍມິງ (7)

ອ້າຍສົມບັດທີ່ແສນຮັກ,

ມື້ນີ້ ວັນທີ 17 ເດືອນ ກຸມພາ ເປັນມື້ວັນເກີດຂອງອ້າຍ. ມັນເປັນປີທີ 3 ທີ່ອ້າຍບໍ່ໄດ້ ສະຫລອງວັນເກີດກັບນ້ອງ. ບໍ່ໄດ້ສະຫລອງວັນເກີດກັບນ້ອງກໍແມ່ນມີຄວາມຍາກຫລາຍ ແລ້ວ; ແຕ່ວ່າ ບໍ່ມີອ້າຍສົມບັດຢູ່ກັບ ຊຸຍມິງ ໃນມື້ພິເສດນີ້ ກໍຍັງເປັນການເສົ້າໃຈທີ່ ອົດທົນໄດ້ຍາກ.

17 February 2015ເພື່ອເປັນການລະນຶກເຖິງມື້ວັນເກີດນັ້ນ, ພີ່ນ້ອງ ຄອບຄົວຂອງອ້າຍສົມບັດແລະນ້ອງເອງໄດ້ໄປ ເຄນອາຫານ ຢູ່ວັດປ່ານາຄູນນ້ອຍໃຫ້ພຣະສົງ ຊຶ່ງເປັນວັດທີ່ເຈົ້າໄດ້ມີການພົວພັນ ຢ່າງໃກ້ຊິດ. ເປັນວັດທີ່ເຈົ້າໄດ້ເລີ່ມຕັ້ງ ໂຄງການ ພຸດທະສາສະໜາເພື່ອການພັດທະນາ (ຄ.ພ.ພ) ເປັນຄັ້ງທຳອິດ ຢູ່ໃນຄວາມອຸປະຖັມຂອງ ພຣະອາຈານຊາລີ ຮອງປະທານ ຂອງອົງການ ພຸດທະສາສະໜາ ສຳພັນລາວ. ຢູ່ໃນ ຄ.ພ.ພ ເຈົ້າຍັງສາມາດໄດ້ສະເໜີ ຕໍ່ ພຣະສົງຈຳນວນນຶ່ງ ແນວຄິດຂອງພຸດທະສາສະໜາທີ່ຕ້ອງເອົາຈິງເອົາຈັງ ເປັນລະບົບ ຂອງການສິດສອນພຸດທະສາສະໜາ ແລະພາກປະຕິບັດທີ່ຈຸງໃຈໃຫ້ພຣະສົງອອກຈາກ ຂອບເຂດຂອງວັດວາອາຮາມແລະມີພັນທະຫລາຍຂຶ້ນກັບບັນຫາ ທີ່ກະທົບຕໍ່ຊຸມຊົນທົ່ວໄປ ແລະໃນສັງຄົມ. Continue reading “ເຖິງສົມບັດ…ຈາກ ຊຸຍມິງ (7)”