Year: 2014

ວິທະຍຸເອເຊຍເສຣີ: (20 ພະຈິກ 2014)

ບັນດາ ປະເທດ ຄູ່ຮ່ວມ ພັທນາ ຍັງຄົງ ສືບຕໍ່ ທວງຖາມ ທາງ ການລາວ ເຣື້ອງການ ລັກພາ ຕົວ ທ່ານ ສົມບັດ ສົມພອນ ຢູ່ ກອງປະຊຸມ ໂຕະມົນ ວັນທີ 14 ທີ່ ຜ່ານມາ ເຖີງວ່າ ຈະບໍ່ມີ ຄຳຕອບ ທີ່ຊັດເຈນ ກໍຕາມ ເພາະວ່າ ທາງ ກອງປະຊຸມ ຖືວ່າ ບັນຫາ ສິດທິ ແມ່ນ ເງື່ອນໄຂ ການ ຮ່ວມມື ກັບ ສປປລາວ.

ຕົວແທນ ຈາກ ສະຫະພາບ ຢູໂຣບ ສະຖານທູດ ເຢັຽຣະມັນ ສະຖານທູດ ຝຣັ່ງ ສະຖານທູດ ອັງກິດ ແລະ ສະຖານທູດ ອະເມຣິກາ ປະຈຳລາວ ຍັງສືບຕໍ່ ທວງຖາມ ເຣື້ອງ ການຫາຍ ສາບສູນ ຂອງ ທ່ານ ສົມບັດ ສົມພອນ ຢູ່ ໃນ ກອງປະຊຸມ ໂຕະມົນ.

ຜູ້ເຂົ້າຮ່ວມ ກອງ ປະຊຸມ ໂຕະມົນ ໄດ້ ຣາຍງານ ວ່າ ບັນດາ ຕົວແທນ ຈາກ ສະຫະພາບ ຢູໂຣບ ແລະ ຈາກ ສະຖານທູດ ດັ່ງກ່າວ ໄດ້ຕັ້ງ ຄຳຖາມ ຕໍ່ ເຈົ້າໜ້າຝ່າຍ ລາວ ກ່ຽວກັບ ທ່ານ ສົມບັດ ສົມພອນ ຈົນເຮັດໃຫ້ ເຈົ້າໜ້າທີ່ ຂັ້ນສູງ ທ່ານ ນຶ່ງ ເກີດອາການ ບໍ່ພໍໃຈ ແລ້ວ ຕອບໄປວ່າ ຄູ່ຮ່ວມ ພັທນາ ຄວນ ຈະສຸມໃສ່ ບັນຫາ ທີ່ໃຫຍ່ ແລະ ສໍາຄັນ ໃນ ປະເທດ ລາວ ຫລາຍກວ່າ ທີ່ ຈະມາເວົ້າ ເຣື້ອງ ທ່ານ ສົມບັດ ເພາະ ມັນເປັນ ເຣື້ອງ ເລັກນ້ອຍ.

ນອກຈາກ ນີ້ ສະຫະພາບ ຢູໂຣບ ປະຈຳລາວ ໄດ້ອອກ ຖແລງການ ເຖິງ ຣັຖບານ ລາວ ໃນໂອກາດ ທີ່ ເຂົ້າຮ່ວມ ກອງປະຊຸມ ໂຕະມົນ ໃນຄັ້ງນີ້. ເນື້ອໃນ ຂອງ ຖແລງ ການ ຕອນນຶ່ງ ແມ່ນໄດ້ ເວົ້າເຖິງ ກໍຣະນີ ຂອງ ທ່ານ ສົມບັດ ສົມພອນ ນັກ ພັທນາ ອະວຸໂສ ດີເດັ່ນ ຂອງລາວ ທີ່ ບໍ່ມີ ຄຳ ອະທິບາຍ ໃດໆ ຈາກ ທາງການ ລາວ ແລະ ຮຽກຮ້ອງ ໃຫ້ ຣັຖບານ ລາວ ແກ້ໄຂ ບັນຫາ ນີ້ ຢ່າງ ຮີບດ່ວນ.

ໃນຕອນນຶ່ງຂອງຖະແຫລງການດັ່ງກ່າວໄດ້ວ່າເວົ້າ: ໃນກອງປະຊຸມໂຕມົນປີທີ່ຜ່ານມາ ພວກເຮົາໄດ້ຍົກ ບັນຫາການຫາຍໂຕແບບບໍ່ສາມາດອະທິບາຍໄດ້ຂອງ ທ່ານ ສົມບັດ ສົມພອນ ພວກເຮົາໄດ້ຮັບການຢືນຢັນຈາກ ຣັຖບານ [ລາວ] ວ່າ ຣັຖບານລາວໄດ້ດຳເນີນທຸກຂັ້ນຕອນ ເພື່ອສືບຕໍ່ການສືບສວນ ແລະ ນຳຜູ້ກະທຳຜິດມາ ລົງໂທດຕາມກົດໝາຍ. ປີນຶ່ງຜ່ານ (ແລະ ເກືອບສອງປີ ພາຍຫລັງການຫາຍໂຕໄປຂອງທ່ານ ສົມບັດ) ພວກເຮົມມີຄວາມເປັນຫວ່ງຢ່າງສູງ ທີ່ຄະດີບໍ່ມີຄວາມຄືບໜ້າເທົ່າທີ່ຄວນ ແລະ ທ່ານ ສົມບັດ ຍັງບໍ່ສາມາດ ເກັບຄືນມາສູ່ຄອບຄົວຂອງເພີ່ນ. ອີກຢ່າງນຶ່ງ ພວກເຮົາຂໍຮຽກຮ້ອງມາຍັງຣັຖບານ ລາວ ແກ້ໄຂກໍລະນີນີ້ ຢ່າງຮີບດ່ວນ. Continue reading “ກອງປະຊຸມໂຕະມົນຖາມເຣື້ອງ ທ.ສົມບັດ”

ວິທະຍຸເອເຊຍເສຣີ: (ພະຈິກ 2014)

ສະຫະພາບ ຢູໂຣບ ປະຈຳລາວ ໄດ້ອອກ ຖແລງການ ເຖິງ ຣັຖບານ ໃນໂອກາດ ທີ່ ເຂົ້າຮ່ວມ ກອງປະຊຸມ ໂຕະມົນ ກັບ ຣັຖບານ ລາວ ທີ່ ຈະມີຂຶ້ນ ໃນມື້ນີ້ ວັນທີ 14 ພຶສຈິກາ.

ເນື້ອໃນ ຂອງ ຖແລງການ ຕອນນຶ່ງ ແມ່ນໄດ້ ເວົ້າເຖິງ ກໍຣະນີ ການ ຫາຍສາບສູນ ຂອງ ທ່ານ ສົມບັດ ສົມພອນ ນັກ ພັທນາ ອະວຸໂສ ດີເດັ່ນ ຂອງລາວ ທີ່ ບໍ່ມີຄຳ ອະທິບາຍ ຈາກ ທາງການ ລາວ ແລະ ຮຽກຮ້ອງ ໃຫ້ ຣັຖບານ ລາວ ແກ້ໄຂ ບັນຫາ ນີ້ ຢ່າງ ຮີບດ່ວນ.

ສະເພາະ ວາລະ ກອງປະຊຸມ ໂຕະມົນ ປະຈຳປີ ໃນຄັ້ງນີ້ ມີສອງ ຫົວຂໍ້ ຫລັກ ຄື: ອັນທີ ນຶ່ງ ແມ່ນການ ປະຕິບັດ ແຜນ ພັທນາ ເສຖກິດ ສັງຄົມ ຄັ້ງທີ 7 ແລະ ອັນທີສອງ ແມ່ນ ຄວາມ ຄືບໜ້າ ຂອງ ການ ປະຕິບັດ ແຜນງານ 16 ຂໍ້ ທີ່ໄດ້ມີ ການຕົກ ລົງ ກັນເອົາໄວ້ ຢູ່ໃນ ກອງປະຊຸມ ໂຕະມົນ ໃນປີ ທີ່ ຜ່ານມາ.

ເຈົ້າໜ້າທີ່ ຈາກ ອົງການ ຈັດຕັ້ງ ທາງ ສັງຄົມ ທ່ານ ນຶ່ງ ກ່າວວ່າ ພວກເຮົາ ຕ້ອງໄດ້ມີ ການ ທົບທວນ ແລະ ທວງຖາມ ທາງການ ລາວ ວ່າ ແຜນງານ ທີ່ ໄດ້ຕົກລົງ ກັນໃນປີ ທີ່ ຜ່ານມາ ມີຫຍັງ ປະຕິບັດ ໄດ້ແດ່ ແລ້ວ ແລະ ມີຫຍັງໄດ້ ຮັບການ ປັບປຸງ ແລ້ວ.

ນຶ່ງໃນ ແຜນງານ 16 ຂໍ້ ນັ້ນ ແມ່ນເຣື້ອງ ການທົບທວນ ສິດທິມະນຸດ ໂດຍສະເພາະ ຂະບວນ ການທົບທວນ ປະຈຳ ລະຍະ ກ່ຽວກັບ ປະຕິບັດ ວຽກງານ ດ້ານ ສິດທິມະນຸດ ຢູ່ ລາວ. ໃນ ກອງປະຊຸມ ໂຕະມົນ ກັບ ຣັຖບານ ລາວ ໃນ ປີ 2013 ທີ່ ຜ່ານມາ ສະຫະພາບ ຢູໂຣບ ກໍໄດ້ອອກ ຖແລງການ ແລະ ເນື້ອໃນ ສ່ວນນຶ່ງ ຂອງ ຖແລງການ ກໍໄດ້ຍົກ ກໍຣະນີ ເຣື້ອງການ ຫາຍສາບສູນ ຂອງ ທ່ານ ສົມບັດ ສົມພອນ ແຕ່ບໍ່ໄດ້ ຮັບ ຄຳຕອບ ໃດໆ ຈາກ ທາງການ ລາວ.